काठमाडौँ। बंगलादेशदेखि नेपाल बोलाएर बन्धक बनाउँदै फिरौती उठाउने गरेको आरोपमा प्रहरीले ६ जनालाई पक्राउ गरेको छ। युवतिहरुको प्रयोग गरि जागिरको प्रलोभन देखाएर बन्धक बनाइ परिवारसँग फिरौती माग गर्ने समूहका ६ जनालाई विभिन्न ठाउँबाट पक्राउ हो।
काठमाडौँ उपत्यका अपराध अनुसन्धान कार्यालयले पक्राउ गरी उनीहरुलाई आइतबार सार्वजनिक गरेको हो। पक्राउ पर्नेहरूमा चार जना बंगलादेशी नागरिक छन् भने दुई जना नेपाली नागरिक छन्।
बंगलादेशको गाजिपुरका ४७ वर्षीय अमिर हुसेन, बंगलादेशको कुमिल्लाका ३८ वर्षीय सलिम मिया, बंगलादेशकै बारिसालका ३७ वर्षीय एमडी मोसिउर रहमान, बंगलादेशकी २१ वर्षीय जहन्जिर आलम, बंगलादेश ढाकाका २१ वर्षीया थमिन बेगम छन्। त्यसैगरी नेपाली नागरिकहरू इलामको चालाचुलीका ३३ वर्षीया रोशनी राई र सिन्धुपाल्चोकको बलेफी–६ का २७ वर्षीया तारा नेपाली छन्।
बंगलादेशी नागरिककै योजनामा नेपाली युवती प्रयोग गरेर बंगलादेशीलाई काठमाडौँ बोलाउने र बन्धक बनाएर फिरौती उठाउने गरेको पाइएपछि उनीहरूलाई पक्राउ गरिएको अपराध अनुसन्धान कार्यालयका एसएसपी डा. मनोज केसीले जानकारी दिए।
यो समूहले वैदेशिक रोजगारीका नेपालबाट अन्य देश पठाउने भन्दै बोलाउने र काठमाडौँ आएपछि सेफ हाउसमा बन्धक बनाएर रकम असुल्ने गरेको पाइएको छ। काठमाडौँमा बन्धक बनाएपछि बंगलादेशमा रहेका उनीहरूका आफन्तलाई फोन तथा भिडिओ कल गर्दै फिरौती रकम लिने गरेको पाइएको छ।
यसरी यो समूहले एक व्यक्तिको परिवारबाट १० लाख रुपैयाँसम्म फिरौती रकम लिएको पाइएको एसएसपी केसीले बताए। फिरौती नदिए ज्यान मार्नेसम्मको धम्की दिने गरेको पाइएको छ।
पक्राउ परेका चार बंगलादेशी र दुई नेपाली गरी ६ जनालाई थप कारबाही तथा अनुसन्धानका लागि जिल्ला प्रहरी परिसर काठमाडौँ पठाइएको छ। उनीहरूविरुद्ध मुलुकी अपराध संहिता २०७४ को दफा २११ र २१२ तथा संगठित अपराध निवारण ऐन २०७० बमोजिमको कसुरमा अनुसन्धान अघि बढाइएको छ।
