बुढीगण्डकीलाई चालु आर्थिक वर्षभन्दा ८ अर्ब बढी बजेट विनियोजन

• बुधबार, १६ जेष्ठ, २०७५
• 3 months ago
• अर्थ

काठमाडौं । राष्ट्रिय गौरवको आयोजना बुढीगण्डकी जलविद्युत आयोजनाको लागि सरकारले १७ अर्ब ९९ करोडल ९६ लाख रुपैयाँ बजेट विनियोजन गरेको छ । 

 

आर्थिक वर्ष २०७५/०७६ मा सरकारले बुढीगण्डकी जलविद्युत आयोजनालाई चालु आर्थिक वर्षको भन्दा झण्डै ८ अर्ब बढी बजेट विनियोजन गरेको हो ।

 

सरकारले चालु आर्थिक वर्षमा बुढीगण्डकी जलविद्युत आयोजनालाई १० अर्ब १७ करोड बजेट विनियोगन गरेको थियो । 

 

आगामी वर्षका लागि विनियोजन गरेको रकममध्ये अधिग्रहण गरिएको जग्गाको मुआब्जा वितरणका लागि मात्रै १७ अर्ब ७३ करोड छुट्याइएको छ । 

 

बाँकी रकमले पुनर्बास र पुनर्स्थापनाका कामहरु पनि सुरु गरिने बुढीगण्डकी जलविद्युत आयोजना वातावरण, मुआब्जा, पुनर्बास तथा पुनस्थापना इकाइका प्रमुख कृष्णबहादुर कार्कीले बताए ।

 

बुढीगण्डकी जलविद्युत आयोजनाको डुवान क्षेत्रमा पर्ने गोरखा र धादिङका साविकका २७ गाविसका जग्गा सरकारले २०७३ चैतदेखि नै खरिद बिक्री रोक्का गरेको छ ।

 

रोक्का गरिएकामध्ये चालु आर्थिक वर्षसम्म गोरखा र धादिङका गरी साविकका १२ गाविसको मात्र मुआब्जा वितरण सकिने अनुमान गरिएको छ । सरकारले पर्याप्त बजेट विनियोजन नगर्दा मुआब्जा वितरण लम्बिरहेको छ ।

 

बुढीगण्डकी आयोजनाको डुवान क्षेत्रमा पर्ने आरुघाट, आर्खेत र खहरे बजारको जग्गाको भने मुआब्जा नै तोकिएको छैन । कार्कीले अहिलेको बजेटले ती क्षेत्रको समेत मुआब्जा वितरण गर्न पु्ग्ने वा नपुग्नेबारे हिसाब गरिनसकेको बताए ।

 

अर्थमन्त्री डा. युवराज खतिवडाले मंगलबार संसदमा बजेट प्रस्तुत गर्दा आगामी आर्थिक वर्षमा बुढीगण्डकी आयोजनाको मुआब्जा वितरण गरिसक्ने र निर्माण सुरु गर्ने बताएका थिए ।

भिडियो