दक्ष जनशक्तिका लागि लगानी गर्दै रुकुमका स्थानीय तह

काठमाडौँ । निर्वाचनको समयमा उम्मेदवारले पूरा हुने तथा नहुने विभिन्न आश्वासन बाँड्दै हिँडेको विषयलाई धेरैले नौलो मान्दैनन् । आश्वासनका रूपमा अगाडि सारिएका नारा र विषयमध्ये थोरै मात्रै पूरा हुने गरेको छ । 

 

स्थानीय तहको निर्वाचनमा धेरैजसो उम्मेदवारले स्मार्ट सिटीको नारा अगाडि सारे । गर्न सकिने र नसकिने नारा दिने उम्मेदवार कोही विजयी भए भने कोही पराजित भए । बझ्दै नबुझी नारा र आश्वासन दिने धेरैजसो उम्मेदवार आगामी निर्वाचनमा देखिएलान् वा नदेखिएलान् त्यसको कुनै निश्चित छैन । 

 

आश्वासन बाँडेकै भरमा निर्वाचन जितेका जनप्रतिनिधिले आफ्ना प्रतिबद्धता के कति पूरा गरे भन्ने खोजी शुरु भएको छ । स्थानीय तहको गत निर्वाचनमा जनतासमक्ष गरेको प्रतिबद्धता पूरा गर्नेमा रुकुमको आठबिसकोट नगरपालिका देखिएको छ । शिक्षा, स्वास्थ्यमा लगानी गर्ने र आर्थिक समृद्धिको जग बसाउने लक्ष्यका साथ सो नगरपालिकाले अभियान नै चलाएको छ । 

 

नेपाल कम्युनिस्ट पार्टी (नेकपा) का स्थायी समिति सदस्य एवं पूर्वमन्त्री जनार्दन शर्माको संयोजनमा आठबिसकोट नगरपालिकाले स्थानीय दुई विद्यार्थीलाई विमान चालक पढाइका लागि फिलिपिन्स पठाएको छ । रुकुमको आठबिसकोट नगरपालिका–५ का ललित भण्डारी र सोही नगरपालिका–१० का गोविन्द केसी विमान चालक पढाइका लागि सोमबार साँझ फिलिपिन्स उडेका छन् । 

 

नगरपालिकाले दुई विद्यार्थीका लागि रु ५०÷५० लाख रकम उपलब्ध गराएको छ । शैक्षिक कर्जा भने उनीहरूले विस्तारै तिर्ने गरी व्यवस्था मिलाइएको छ । त्रिभुवन अन्तर्राष्ट्रिय विमानस्थलमा जहाज चढ्ने प्रतीक्षामा रहेका बेला भण्डारीले आफ्नो पाइलट बन्ने सपना पूरा गर्न नेकपाका नेता जनार्दन शर्मा र नगरपालिकाका प्रमुख गोरखबहादुर केसीले खेल्नुभएको भूमिकाको उच्च प्रसंशा गरे । 

 

‘सानैदेखिको पाइलट बन्ने रुचि थियो, विदेश गएर पढ्नुपर्ने विमान चालक पढाइको पाड्यक्रमका लागि पैसा थिएन । तर नगरपालिकाले विश्वास गरेर हामीलाई पैसा दियो’, भण्डारीले भने, ‘सामाजवादको आधार तयार पार्ने र गाउँमै दक्ष जनशक्ति उत्पादन गर्ने भनेर निर्वाचनका क्रममा नेता शर्माले व्यक्त गर्नुभएको प्रतिबद्धता पूरा गर्नुभएको छ ।’ 

 

विमान चालक पढाइका लागि अध्ययन गर्न गएका अर्का विद्यार्थी केसीले पनि निर्वाचनमा राजनीतिक नेतृत्वले प्रतिवद्धता मात्रै जनाउँदैनन् त्यसलाई पूरा गर्छन् भन्ने कुरा व्यवहारिक रुपमा पुष्टि भएको बताए । ‘जुन विश्वासका साथ हामीलाई राजनीतिक नेतृत्वले लगानी गरेको छ, त्यसलाई म दृढताका साथ पूरा गर्नेछु । आर्थिक रूपमा विपन्न परिवारको चाहना पूरा भएको छ’, केसीले भने । 

 

उनीहरू मात्र होइन, नगरपालिकाले चिकित्सक, इञ्जिनीयर पढ्न चाहने विद्यार्थीका लागि समेत आवेदन माग गरेको छ । नगरपालिकाले यसअघि पाँच जनालाई नर्स र ओभरसियर अध्ययनको व्यवस्था मिलाइसकेको छ । दक्ष र प्राविधिक जनशक्ति उत्पादन गर्ने भनेर निर्वाचनका क्रममा गरिएको प्रतिबद्धताअनुसार नै शैक्षिक कर्जा दिन थालिएको नगर प्रमुख गोरखबहादुर केसी बताउँछन् । 

 

शैक्षिक कर्जा लिनका लागि आवश्यक धितो र त्यसका लागि आवश्यक शैक्षिक योग्यता भएको कागजात पेश गर्नुपर्ने नियम बनाइएको छ । आठबिसकोट बचत तथा ऋण सहकारी संस्थाबाट शैक्षिक कर्जा लिने व्यवस्था नगरपालिकाले गरिदिएको छ । सहकारीबाट लिइएको ऋणको ब्याज नगरपालिकाले तिर्ने व्यवस्था गरिएको छ । 

 

रुकुमको स्थायी बासिन्दा रहेका नेकपाका नेता शर्माले दक्ष र योग्य जनशक्ति उत्पादन गर्ने लक्ष्यका साथ आफूहरूले योग्य विद्यार्थीलाई अध्ययनका लागि विदेश पठाएको बताउँछन् । आर्थिक समृद्धिका लागि दक्ष जनशक्ति जरुरी रहेको भन्दै उहाँले रुकुममा हरेक स्थानीय तहले स्वास्थ्य र शिक्षामा लगानी गरेको र त्यसको प्रतिफल आगामी केही वर्षदेखि देखिने बताए । 

 

स्थानीय तहले शैक्षिक कर्जा लिएर अध्ययन गरेका विद्यार्थीले रोजगारी पाएपछि मात्रै कर्जाको सावाँ र ब्याज तिर्ने व्यवस्था मिलाएको छ । नेता शर्माले भने, ‘हामीले निर्वाचनका क्रममा जनतासामु गरेको प्रतिबद्धतालाई व्यावहारिक रूपमा नै कार्यान्वयन थालेका छौँ । यसलाई अरु जिल्लाले समेत अनुशरण गर्न सक्छन् ।’ 

 

पछिल्लो व्यवस्थाअनुसार पश्चिम रुकुमको रूपमा परिचित सो जिल्लामा तीन नगरपालिका र तीन गाउँपालिका रहेका छन् । गत स्थानीय तहको निर्वाचनमा तत्कालीन नेकपा (माओवादी केन्द्र)ले एकलौटी रूपमा सो जिल्लाको सबै स्थानीय तहमा विजय हासिल गरेको थियो । 

 

विमान चालक तथा चिकित्सक अध्ययन गर्न चाहने योग्य विद्यार्थीलाई नगरपालिकाको सिफारिशमा सहकारीले रु ५० लाखसम्म ऋण दिने व्यवस्था गरिएको छ । राज्यले विगतमा शैक्षिक क्षेत्रमा ठूलो लगानी गरेको भए पनि ग्रामीण क्षेत्रका विद्यार्थीले त्यसबाट फाइदा लिन सकेका थिएनन् । नगरपालिकाका प्रमुख केसीले दक्ष जनशक्ति उत्पादन गर्ने र स्थानीय तहबाटै आर्थिक समृद्धिसहितको समाजवादको यात्रा तय गर्ने लक्ष्यका साथ शिक्षा र स्वास्थ्यमा लगानी बढाइएको बताए ।

 

स्रोतको अभावमा क्षमता भएका विद्यार्थीले समेत प्राविधिक विषयमा अध्ययन गर्न नपाएकाले खाडी मुलुकमा रोजगारीको खोजीमा जानुपर्ने बाध्यताको अन्त्य गर्न खोजिएको नगरपालिकको भनाइ छ । प्रमुख केसी स्वदेश वा विदेश जहाँ भए पनि एक÷एक जनालाई त्यस्तो सुविधा वार्षिक रूपमा उपलब्ध गराउने बताउँछन् । 

 

नेकपाका नेता शर्माले नारा र भाषणको भरमा मात्रै समृद्धिको यात्रा तय हुन नसक्ने भएकाले व्यावहारिक रूपमा नै प्रयास गरिएको जानकारी दिए । विमान चालक पढाइका लागि गएका केसी र भण्डारीले पनि स्थानीय सरकार र राजनीतिक नेतृत्वले गरेको विश्वासलाई साकार बनाउने र जिल्लाको नाम राख्ने प्रतिबद्धता व्यक्त गरे । 

 

जहाज चढ्न हतारमा रहेका भण्डारीले त आर्थिक पहुँचभन्दा बाहिर रहेको विमान चालकसम्बन्धी अध्ययन गर्ने सपना पूरा भएकामा पटक–पटक नेता शर्मा र नगरप्रमुख केसीलाई धन्यवाद दिए । 

 

रुकुमको स्थानीय तहले शुरु गरेको यस्ता सकारात्मक प्रयासलाई अन्य जिल्लाका स्थानीय तहले पनि अनुशरण गर्न सक्ने र आफूहरू जस्तै प्राविधिक शिक्षा अध्ययन गर्न चाहनेलाई सहयोग गर्न आग्रह गर्छन् विद्यार्थी केसी ।

 

त्रिचन्द्र कलेजबाट बिएस्सी गर्नुभएका केसी र भण्डारीले फिलिपिन्सबाट अध्ययन सकेर देश र जिल्लाको सेवा गर्ने प्रतिबद्धता मात्रै व्यक्त गरेनन् अरु जिल्लालाई पनि यस्तो अभियान शुरु गर्न अनुरोध गरे । 


थप समाचार

आन्तरिक पर्यटन मेला शुक्रबारदेखि

  • 1 minute ago
आन्तरिक पर्यटन मेला शुक्रबारदेखि

काठमाडौँ । नेपालको विविध पर्यटकीय उत्पादन र वस्तुहरुलाई एउटै स्थलमा प्रर्दशन गरी पर्यटकलाई जानकारी गराउने उदेश्यले राजधानीमा शुक्रबारदेखि ‘डोमेस्टीक टुरिजम मार्ट’ आन्तरिक पर्यटन मेलाको आयोजना गर्न लाग

ग्यारेथ बेललाई चिनिया क्लबबाट मात्रै प्रस्ताव !

  • 1 minute ago
ग्यारेथ बेललाई चिनिया क्लबबाट मात्रै प्रस्ताव !

काठमाडौँ । स्पेनिस क्लब रियल मड्रिडका फरवार्ड ग्यारेथ बेललाई चिनिया क्लबबाट मात्रै प्रस्ताव आएको समाचार प्रकाशित भएको छ । रियल मड्रिडमा असन्तुष्ट बेललाई क्लबले बेच्ने तयारी गरिरहेको बेला उनलाई एक चाइन

पोउल पोग्वाले म्यानचेस्टर युनाइटेड छोड्ने पक्का !

  • 7 minutes ago
पोउल पोग्वाले म्यानचेस्टर युनाइटेड छोड्ने पक्का !

एजेन्सी । म्यानचेस्टर युनाइटेडका मिडफिल्डर पोउल पोग्वाले रियल मड्रिड जाने संकेत देखाएका छन् । मिडिया रिपोर्टका अनुसार म्यानचेस्टर युनाइटेड च्याम्पियन्स लिगमा छनोट नहुने संकेत देखेपछि यस्तो निर्णय लिएक



प्रेम र यौन

अविस्मरणीय सुहागरातका लागि

अविस्मरणीय सुहागरातका लागि

विवाह पहिले यौन सम्पर्क गर्नु वा नगर्नु व्यक्तिको निर्णय हो । नवविवाहित दम्पतीले कौमार्यकै आधारमा एक अर्कालाई परीक्षण गर्नु उपर्युक्त हुँदैन । जोडीको ध्यान र क्रियाकलाप आफ्नो पहिलो यौन क्रियाकलापलाई कसरी खास बनाउने भन्नेमा केन्द्रीत हुनुपर्छ ।

जीवनशैली/स्वास्थ्य

यस्तो रहेको छ आजको तपाईको भाग्य

यस्तो रहेको छ आजको तपाईको भाग्य

वि.सं.२०७६ साल वैशाख १२ गते । बिहीबार । ईश्वी सन् २०१९ अप्रिल २५ तारिख । नेपाल संवत् ११३९ । परिधावी संवत्सर । उत्तरायण । वसन्त ऋतु । श्रीशाके १९४० । वैशाख कृष्ण पक्ष । तिथि षष्ठी ,२३ घडी २३ पला, दिउसो ०२ बजेर ५४ मिनेट उप्रान्त सप्तमी । नक्षत्र पूर्वाषाढा, ४२ घडी ४४ पला, बेलुकी १० बजेर ३८ मिनेट उप्रान्त उत्तरषाडा । योग सिद्ध, ५३ घडी २१ पला, रातको ०२ बजेर ५३ मिनेट उप्रान्त साध्य ।