सप्तरीमा बिँडी नदिएको झोकमा मागिखाने मान्छेको हत्या

जनकपुरधाम। बिँडी नदिएको झोकमा सप्तरीमा एक युवकले मागिखाने व्यक्ति हत्या गरेको खुलेको छ।

सप्तरीको कंचनरुप नगरपालिका– ८ बेरियर चौकमा रहेको बस बिसौनीको प्रतिक्षालयमा गत असार ३१ गते बिहान परिचय नखुलेको मागि खने अन्दाजी ६०–६५ वर्षीय पुरुषको शव फेला परेको थियो।

उनको हत्या बिँडी नदिएको झोकमा एक युवकले गरेको खुलेको हो। उनको हत्यामा कञ्चनरूप नगरपालिका १० बदगमा टोलका २८ वर्षीय मनोज पासवानको संलग्नता रहेको ईलाका प्रहरी कार्यालय कञ्चनरुपका डिएसपी दीपक रायले जानकारी दिए। मनोजलाई बुधबार प्रहरीले पक्राउ गरेको छ।

डिएसपी रायका अनुसार मागी खाने व्यक्ति प्रतिक्षालयमा सुती बिँडी खाई रहेको र आफूलाई पनि खान मन लागेपछि मनोजले एउटा बिँडी मागेका थिए। तर मागिखाने व्यक्तिले बिँडी नदिई तथानाम गाली गलौज गर्न लागेपछि आवेगमा छेउमा राहेको बाँसको लाठीले उनको टाउँकोमा चार÷पाँच लाठी प्रहार गरि भागेको मनोजले बयान दिएको डिएसपी रायले बताए।मनोज उपर कर्तव्य ज्यान मुद्दामा कानुन बमोजिम कार्बाही गर्ने सप्तरी प्रहरीको तयारी छ।