एजेन्सी । लिग्स कप अन्तर्गत इन्टर मियामीले लगातार दोस्रो जित निकालेको छ । नेपाली समयानुसार बुधबार बिहान भएको खेलमा मियामीले एटलान्टा युनाइटेडलाई ४–० गोलले पराजित गरेको हो ।
मियामीको जितमा लियोनल मेसी र रोबर्ट टेलरले दुई–दुई गोल गरे । खेलको ८ औं मिनेटमा नै मेसीले गोल गर्दै मियामीलाई सुरुवाती अग्रता दिलाएका थिए ।
२२ औं मिनेटमा मेसीले दोस्रो गोल गर्दै अग्रता दोब्बर पारे । यस्तै, ४४ औं मिनेटमा टेलरले गोल गर्दै मियामीलाई ३–० ले अघि बढाए ।
५३ औं मिनेटमा टेलरले व्यक्तिगत दोस्रो तथा टोलीका लागि चौंथो गोल गरे । यता, खेलको ८४ औं मिनेटमा क्रिस्टोफर एमसीभेले रातो कार्ड खाँदै मैदानबाट बाहिरिएपछि मियामी १० खेलाडीमा समेटिएको थियो । मियामीको यो लगातार दोस्रो जित हो ।
यसअघि डेब्यु खेलमै मेसीले अन्तिम समयमा गोल गर्दै मियामीलाई पहिलो जित दिलाएका थिए । समूह जे मा रहेको मियामीले ६ अंक जोडेको छ । यो जितसँगै मियामी साउथ समूह ३ को विजेता बन्दै नकआउट चरणमा प्रवेश गरेको छ । अमेरिकी र क्यानडाका टोलीले खेल्ने मेजर लिग सकर र मेक्सिकोको लिगा एमएक्सको ४७ टोली यस प्रतियोगितामा प्रतिस्पर्धा गर्दैछन् ।
