किम जोङले उच्च सैन्य जनरललाई बर्खास्त गर्दै भने, ‘युद्धको तयारी गर’

एजेन्सी । उत्तर कोरियाली शासक किम जोङ फेरि एकपटक चर्चामा छन् । यसपटक उनी मिसाइल परीक्षणका कारण नभई आफ्नो सेनाका शीर्ष सैन्य जनरल परिवर्तनको खबरले चर्चामा छन् ।

उनले आफ्नो शीर्ष सेनापतिलाई बर्खास्त गरेका छन्। योसँगै युद्धको तयारी गर्न पनि भनिएको छ । किमले हतियार उत्पादन बढाउन र सैन्य अभ्यास बढाउन आदेश दिएका छन्।

उत्तर कोरियाको आधिकारिक च्यानल केआरटीका अनुसार किमले बुधबार केन्द्रीय सैन्य आयोगको बैठकको अध्यक्षता गरेका थिए। यस अवधिमा उत्तर कोरियाका शत्रुहरूलाई रोक्नका लागि प्रतिकार्य योजनाहरूबारे छलफल भएको थियो। तर, कुनै शत्रु राष्ट्रको नाम भने दिइएको छैन ।

सरकारी सञ्चारमाध्यमका अनुसार सेनाका शीर्ष जनरल चीफ अफ द जनरल स्टाफ पाक सु इलको स्थानमा जनरल रि योङ गिललाई नयाँ जनरलको रूपमा नियुक्त गरिएको छ। पाक सुइल हटाउनुको कुनै खास कारण भने दिइएको छैन। तर, री योङ गिलले रक्षामन्त्रीको पदमा कायम रहने वा नरहने भन्ने अझै स्पष्ट भइसकेको छैन ।