काठमाडौं । नेकपा (एकीकृत समाजवादी)का अध्यक्ष माधव कुमार नेपालले बालुवाटार जग्गा प्रकरणमा भएको अनियमितताको अनुसन्धानमा सघाउन आफू तयार रहेको बताएका छन् ।
स्वीट्जरल्याण्डबाट फर्किएपछि विमानस्थलमा पत्रकारहरूसँग कुरा गर्दै नेपालले सो कुरा बताएका हुन् । अनुसन्धानमा आफ्नो सहयोगी भूमिका रहने बताउँदै आफू चुनौतीको सामना गर्न तयार रहेको नेपालले प्रस्ट पारे ।
‘बालुवाटार प्रकरणमा केही भएको छ भने त्यसमा छानबिन होस्, त्यसमा मेरो तर्फबाट जे सहयोग गर्नुपर्ने हो मेरो सहयोगी भूमिका रहने छ ।’ उनले भने ‘केहीकेहीले त माधव नेपाल भागे लुकेर बसेका छन् पनि भने । ममा फर्किने हिम्मत छैनसम्म भने । म बोल्दिन चुनौतीको सामना गर्छु । बोलेपछि तह लगाएर बस्छु ।’
ललिता निवास जग्गा प्रकरणमा नीतिगत निर्णयमाथि पनि अनुसन्धान गर्न सर्वोच्च अदालतले आदेश दिएपछि पूर्वप्रधानमन्त्री नेपाल र बाबुराम भट्टराई पनि अनुसन्धानको घेरामा तानिने भएका छन् ।
अदालतले आदेश दिएको भोलिपल्ट नै अध्यक्ष नेपाल विदेश भ्रमणमा निस्किएपछि कतिपयले विदेश जान दिइएको भन्दै सरकारको आलोचना समेत गरेका थिए ।
