काठमाडौँ । एसिया कप क्रिकेट खेल्न नेपाली क्रिकेट टीम भोलि पाकिस्तानतर्फ प्रस्थान गर्दैछ ।
आज क्रिकेट टिमका खेलाडीहरूले पशुपतिनाथ मन्दिरमा पुगेर दर्शन गरेका छन् । नेपाल क्रिकेट संघ (क्यान)ले टीमलाई आज नै बिदाइ गर्दैछ ।
एसिया कप आउँदो भदौ १३ गते (अगस्ट ३०)बाट सुरु हुने भए पनि पाकिस्तानमा केही अभ्यास खेल खेल्न नेपाली टिम चाँडै त्यसतर्फ प्रस्थान गर्न लागेको हो । एसिया कपको उद्घाटन खेलमा नेपाल र पाकिस्तानले प्रतिस्पर्धा गर्दैछन् ।
यसैबीच, नेपाली टिमका लेग स्पिनर सन्दीप लामिछाने भने भोलि पाकिस्तान नजाने भएका छन् । १७ सदस्यीय टोलीमा भए पनि उनी बन्द प्रशिक्षणमा सहभागी भएका छैनन् ।
उनको मुद्दाको फैसलामा ढिलाइ भएपछि सन्दीपले एसिया कप खेल्ने/नखेल्ने निश्चित छैन । गत साउन ३२ गते पेशी तोकिएको भए पनि उनको सुनवाइ स्थगित भएको थियो ।
उनले एसिया कप खेल्ने/नखेल्ने दुई–तीन दिनमा टुंगो लाग्ने स्रोत बताउँछ ।
