एमाले र राप्रपाले बहिस्कार गरेपछि कोशी प्रदेश सभा स्थगित

विराटनगर। कोशी प्रदेशको प्रमुख प्रतिपक्षी दल नेकपा एमाले र प्रतिपक्षी राष्ट्रिय प्रजातन्त्र पार्टी (राप्रपा)ले बुधबारको प्रदेशसभा बैठक बहिष्कार गरेका छन्।

मुख्यमन्त्री उद्धव थापाले विश्वासको मत लिने बैठकमा सभाध्यक्ष इस्राइल मन्सुरीले अमर्यादित व्यवहार प्रदर्शन गरेको भन्दै एमाले र राप्रपाले बैठक बहिस्कार गरेपछि सभाध्यक्ष मन्सुरीले अर्को सूचना नहुञ्जेलसम्म प्रदेशसभा बैठक स्थगित गरिएको घोषणा गरे।

बैठक सुरू हुने बित्तिकै राप्रपाका नेता भक्तिप्रसाद सिटौलाले कुर्सीबाट उठेर सभाध्यक्ष मन्सुरीले सोमबारको प्रदेशसभामा अमर्यादित व्यवहार प्रदर्शन गरेकाले बैठक बहिस्कार गरेको भन्दै सदन बाहिर निस्केका थिए।

राप्रपा सांसदहरू बाहिरिएपछि एमाले सांसदहरू पनि कुर्सीबाट उठेर विरोध गरेका थिए। एमाले प्रदेश सांसद तिलकुमार मेन्याङ्बोले सभाध्यक्ष मन्सुरीले संविधानको धारा १८६ विपरीत सोमबारको बैठकमा मुख्यमन्त्री थापाको विश्वासको मत लिने प्रस्तावमा मतदान गरेकाले सदन बहिस्कार गर्ने बताएपछि एमालेका सबै सांसदहरू पनि सदनबाहिर निस्केका थिए।