कान्ति अस्पतालको इमर्जेन्सीमा बालिका मृत्युको घटना छानबिन गर्न समिति गठन

काठमाडौँ। कान्ति बाल अस्पतालको इमर्जेन्सीमा सोमबार भएको बालिका मृत्युको घटना छानबिनका लागि समिति गठन गरिएको छ। अस्पतालले डा. प्रकाश जोशीको संयोजकत्वमा तीन सदस्यीय समिति गठन गरेको हो।

समितिलाई पाँच दिनभित्र घटनाको सत्यतथ्य पत्ता लगाइ प्रतिवेदन पेस गर्न निर्देशन दिइएको छ।

कान्ति बाल अस्पतालको इमर्जेन्सीमा उपचारका लागि पालो कुर्दै गर्दा मकवानपुर थाहा नगरपालिका—१० की पाँच वर्षीया रेजिशा गोपालीको मृत्यु भएको थियो। उच्च ज्वरोका कारण अस्पताल पुर्‍याइएकी उनको ओपीडी बन्द भएपछि इमर्जेन्सीमा जाँच गर्न नपाउँदै मृत्यु भएको परिवारले बताएका छन्। इमर्जेन्सीमा ८० मिनेट कुराइएकी रेजिशाको उपचारमा ढिलाइ हुँदा मृत्यु भएको अस्पतालले स्वीकार गरेको छ।