रास्वपाले थाल्यो केन्द्रीय सदस्य थापामाथि छानबिन

काठमाडौँ। राष्ट्रिय स्वतन्त्र पार्टी (रास्वपा)ले केन्द्रीय सदस्य मोहनजंग थापामाथि छानबिन थालेको छ। बिबादपछि सांसद पदबाट हटाइएका ढाकाकुमार श्रेष्ठले मोहनजंगको नाम मुछेपछि रास्वपाले थापामाथि छानबिन थालेको हो।

मेडिकल व्यवसायी दुर्गा प्रसाईंसँग दुई करोड रुपैयाँ मागेको अडियो सार्वजनिक भएपछि ढाकाकुमार श्रेष्ठ सांसद पदबाट हटाइएका थिए। उनै श्रेष्ठले केही दिनअघि एक टेलिभिजन अन्तर्वार्तामा कोर टिमको सदस्य मोहनजंगले मन्त्री बनाइदिने भन्दै आफूसँग तीन करोड रकम माग गरेको आरोप लगाएपछि पार्टीले छानबिन थालेको हो।

पार्टीका महामन्त्री मुकुल ढकालले बुधबार विज्ञप्ती जारी गर्दै केन्द्रीय अनुशासन आयोगका प्रमुखसमेतको उपस्थितिमा मंगलबार पार्टीको केन्द्रीय कार्यसम्पादन समितिको बैठक बसेको र केन्द्रीय अनुशासन आयोगबाट केन्द्रीय सदस्य मोहनजंग थापालाई सोधपुछ तथा अनुसन्धानको प्रक्रिया अगाडि बढाइएको उल्लेख छ।

बिनाआधार, बिनाप्रमाण पार्टीको छविमा आँच पुर्‍याउने कलुषित मनसायले आम जनसमुदायमाझ पार्टीका सम्बन्धमा फैलाइएका सूचनाबाट भ्रममा नपर्न रास्वपाले आग्रह पनि गरेको छ।