काठमाडौँ। नेकपा एकीकृत समाजवादीका अध्यक्ष माधवकुमार नेपालले माध्यमिक तहसम्मको शिक्षाको जिम्मेवारी स्थानीय तहलाई दिइएको विषयमा प्रश्न उठाएका छन्। शुक्रबार नेपाल राष्ट्रिय उद्योग व्यवसायीको महासंघको महाधिवेशनमा उनले स्थानीय तहलाई दिँदा शिक्षण संस्थाको उन्नति र प्रगति भन्दा पनि त्यसलाई कसरी उपयोग गर्नेमा मात्रै सीमित रहने अवस्था बन्न सक्ने बताए।
‘शिक्षकहरू आन्दोलनमा किन उत्रिएका छन् भने माध्यमिक तहसम्मको शिक्षाको जिम्मेवारी स्थानीय तहलाई दिइएको छ। माध्यामिक तहसम्मको शिक्षाको जिम्मेवारी स्थानीय तहले पूरा गर्न सक्छ?’ नेता नेपालले भने, ‘उसले आफ्ना मान्छेलाई कसरी भर्ना गर्ने, नजिकका मान्छेले पढोस् नपढोस्, पढाओस्, नपढाओस्। कसैले त्यहाँ भर्ना गर्ने। शिक्षण संस्थाको उन्नती र प्रगति भन्दा पनि त्यसलाई कसरी उपयोग गर्नेमा मात्रै सीमित रहने कुराहरू पनि सोच्न सक्ने स्थिति बन्छ। त्यसो हुनाले पनि प्रश्न उठेको छ।’
उनले आन्दोलनरत शिक्षकहरूको माग सम्बोधनका लागि तत्काल संविधान संशोधन हुने वातावरण नभएको पनि बताए।
उनले दलहरूमा सत्ताबाट बाहिरिपरेको र सत्तामै टिकिरहने चिन्ता भएको सुनाए। उनले शिक्षकका जायज माग वार्ताको माध्यमबाट समाधान गर्नुपर्ने बताए।
