बुटवल। नेपालगञ्जमा जातीय द्वन्द तथा सामाजिक सद्भावलाई कायम राख्नका लागि मंगलबार विहान विभिन्न धर्म गुरुहरुको उपस्थितीमा सद्भाव र्याली निकालिएको छ। ब्यक्तिहरुले सामाजिक सञ्जालको दुरुपयोग गर्दै सामाजिक सदभावमाथि प्रहार गरेको भन्दै आज बिहानै सदभाव र्याली निकालिएको हो।
शान्ति र सदभावको परिचय बोकेको नेपालगन्जको सदभाव कायम राख्न सदभाव र्याली निकालिएको र्यालीमा सहभागीहरुले बताएका छन्। स्थानीय बिपी चोकबाट निकालिएको सदभाव र्याली धम्बोझी चोक पुगेर समापन गरिएको हो।
र्याली समापन कार्यक्रमा नेपालगन्ज उपमहानगरपालिकाका प्रमुख प्रशान्त बिष्ट, बागेश्वरी मन्दिरका महन्त हिन्दु धर्मगुरु चन्दननाथ योगी, मुस्लिम धर्मगुरु मौलाना जब्बार लगायतले नेपालगन्जले बनाएको सदभावको शहरको पहिचानलाई जोगाएर राख्न नगरबासीलाई आह्वान गरे। र्यालीमा स्थानीय राजनीतिक दलका नेताहरु, उद्योगी ब्यवसायी, बिभिन्न धर्मका धर्मगुरुहरु लगायत सर्वसाधारणको उपस्थिती रहेको थियो।
सद्भाव र्यालीपछि पनि हिन्दु धर्मालम्बीहरुको नाममा एक समूहले मंगलबार विहान अर्को र्यालीको आयोजना गरेको छ। नेपालगञ्जको बागेश्वरी मन्दिरदेखि सेतु वि.क. चोकसम्म र्याली गर्दै उनीहरुले ‘गौहत्या बन्द गर, गौहत्या गर्नेलाई कारबाही गर’ लगायतका नारा लगाएका थिए।
सो घटनासँगै स्थिति तनावपूर्ण हुने देखेपछि जिल्ला प्रशासन कार्यालयले कर्फ्यु आदेश जारी गरेको छ। जिल्ला प्रशासन कार्यालय बाँकेले नेपालगञ्जमा कर्फ्यू आदेश जारी गरेको हो। सामाजिक सञ्जालको दुरुपयोग गर्दै केही ब्यक्तिहरुले स्टाटस पोष्ट गरेको विषयमा बादबिबाद सार्वजनिक भएपछि आइतबार जिल्ला प्रशासन कार्यालयमा सर्वपक्षीय भेला बोलाएको थियो।
