नेपालगन्ज । जिल्ला प्रशासन कार्यालय बाँकेले नेपालगन्जमा लगाइएको कर्फ्यु बिहीबार बिहान ८ बजेबाट १२ घण्टाका लागि हटाएको छ ।
एक विज्ञप्ति जारी गर्दै जिल्ला प्रशासन कार्यालयले आज बिहान ८ बजेदेखि राती ८ बजेसम्मका कर्फ्यु हटाएको जानकारी दिएको हो।
बाँकेका प्रमुख जिल्ला अधिकारी विपिन आचार्यले नेपालगन्जको अवस्था क्रमशः सामान्य बन्दै गएको जानकारी दिए ।
उनले आम मानिसको सहजताका लागि १२ घण्टाका लागि कर्फ्यु हटाइएको बताए ।
तर, बिहीबार राती ८ बजेदेखि शुक्रवार बिहान ८ बजेसम्म पुनः कर्फ्यु जारी रहने उनले बताए ।
त्यस्तै जिल्ला प्रशासन कार्यालयले फेरि एक पटक स्थानीय सर्वसाधारणलाई सद्भाव र शान्ति कायम गर्न सबैमा अनुरोध गरेको छ ।
जिल्ला प्रशासन कार्यालय बाँकेले मङ्गलवार दिउँसो १ बजेदेखि अनिश्चितकालका लागि नेपालगन्जमा कर्फ्यु लगाएको थियो ।
