काठमाडौँ। नेकपा एमालेका सांसद रघुजी पन्तले चीन भ्रमणमा स्वर्णिम अवसर गुमाएको बताएका छन्। बिहीबारको प्रतिनिधिसभा बैठकमा बोल्दै उनले यस्तो बताएका हुन्।
चीन भ्रमणमा तत्कालीन प्रधानमन्त्री केपी शर्मा ओलीले प्रस्ताव गरेको नौवटा योजना कार्यान्वय गर्न चुकाउनु देशका लागि दुःखद् भएको बताए। उनले मुलकुको विकास, अग्रगति र गरिबी हटाउनका लागि बीआरआई कार्यान्वयनमा प्रधानमन्त्रीले हात कमाएको आरोप लगाए।
‘प्रधानमन्त्रीले एउटा स्वर्णिम अवसर गुमाउनुभयो। यहाँबाट जाँदा पहिले सम्झौता गरेको बीआरआई लागि भनेर पठाएको नौवटा योजना थियो। तिनीहरुलाई मात्रै कार्यान्वयन गरे पुग्छ भनेर धेरै विज्ञ, राजदूतहरुले सल्लाह दिएका थिए। उहाँले सार्वजनिक रुपमा भन्नुभएको थियो– बीआरआईमा हामी सामेल गर्छौँ, कार्यान्वयन गर्छौँ भनेर,’ सांसद पन्तले भने, ‘तर, फर्केर आउँदा चीनमा उहाँको हात किन काम्यो थाहा छैन। नेपालले एउटा मौका गुमायो। राष्ट्रको पूर्वाधारमा भूमिका खेल्न सक्ने अवसर मुलुकले गुमायो। कमजोर नेतृत्व देशमा भएपछि कसरी अघि बढ्न सक्छ?’
उनले ऋणको पासोमा परिन्छ भनेर बीआरआई कार्यान्वयन नगर्ने भनी गलत प्रचार गरिरहेको दाबी गरे।
