काठमाडौँ। परराष्ट्रमन्त्री एनपी साउदले इजरायलमा रहेका १२ नेपाली सम्पर्कविहीन भएको बताएका छन्। आइतबारको प्रतिनिधिसभा बैठकमा इजरायल घटनाबारे जानकारी गराउँदै सुदूरपश्चिम विश्वविद्यालयबाट गएका विद्यार्थीहरू सम्पर्कविहीन भएको बताएका हुन्।
इजरायलमा ४५ सय नेपालीहरु केयरगिभरको रुपमा कार्यरत रहेको र त्यहाँ हाल २६५ जना नेपाली विद्यार्थीहरु इजरायल सरकारको लरन एण्ड अरन कार्यक्रम अन्तगर्त पढिरहेको भन्दै यसमध्ये नेपालको कृर्षि विश्वविद्यालयबाट ११९ जना, त्रिभुवन विश्वविद्यालयबाट ९७ जना र सुदूरपश्चिम विश्वविद्यालयबाट ४९ जना इजरायलमा रहेको परराष्ट्रमन्त्री साउदले जानकारी गराए। यीमध्ये सुदूररपश्चिम विश्वविद्यालयबाट गएका ४९ जनामध्ये १७ जना नेपालीहरु दक्षिण इजरायलको किबुज अलुमिम भन्ने स्थानमा अध्ययन रत रहेको परराष्ट्रमन्त्रीको भनाई छ।
‘दक्षिणी इजरायलको किबुज अलुमिन भन्ने स्थानमा अध्ययनरत विद्यार्थीहरू सम्पर्कविहीन भएका छन्। राजदूतावासको अनुसार यो स्थान गाजा क्षेत्रबाट नजिक रहेका र त्यही हमास समूहबाट आक्रमण भएकाले १७ जना नेपालीहरूमध्येबाट २ जना सकुशल रहेको तीन जनाको स्थानीय अस्पतालमा उपचार भइरहेको छ,’ उनले भने, ‘बाँकी १२ जना सम्पर्कमा नभएको र केही हताहत भएको हुँदा स्थिति यकिन गर्न संयन्त्र परिचालन गरिएको छ।’
नेपालीहरूको वास्तविक स्थिति पहिचान गर्न, नेपालीहरूलाई सुरक्षित तवरले राख्न, उद्धार तथा सहयोग गर्नको लागि आवश्यक सहजीकरण र समन्वय भइरहेको उनले जानकारी दिए।
