काठमाडौँ। नेपालमा जारी त्रिकोणात्मक श्रृंखलामा खेलमा नेपालले हङकङलाई ४ विकेटले पराजित गरेको छ। बुधबार यूएईलाई ७ विकेटले पराजित गरेको नेपालले हङकङलाई ४ विकेटले पराजित गरेको हो।
बिहीबार मुलपानी मैदानमा भएको खेलमा हङकङले दिएको ९५ रनको सामान्य लक्ष्य नेपालले १३.५ ओभरमा ४ विकेट गुमाएर पार गरेको हो।
नेपालका ओपनर कुशल भुर्तेल ८ रनमा आउट हुँदा उनका ओपनिङ पार्टनर आसिफ शेखले ४२ रन जोडे। आसिफले ३४ बलमा ६ चौका प्रहार गरे। कुशल मल्ल १ रन र सन्दीप जोरा ३ रनमै आउट भए। दुवैलाई हङकङका इशान खानले आउट गरेका हुन्। खानले कुशल भुर्तेललाई पनि आउट गरेका थिए।
कप्तान रोहितकुमार पौडेलले नटआउट २५ रन र गुल्सन झाले नटआउट १४ रन बनाए।
बलिङतर्फ हङकङका इशान खानले ३ विकेट लिए।
त्यसअघि नेपालले टस जितेर बलिङ रोजेपछि पहिले ब्याटिङ गरेको हङकङ ३ बल खेल्न बाँकी छदा ९४ रनमै अलआउट भयो। हङकङका लागि यासिम मुर्ताजाले सबैभन्दा बढी ३६ रन जोडे। जीशन अलीले १७ रन जोड्दा हङकङका अरु ब्याटरले दोहोरो अंकमा रन जोड्न सकेनन्।
बलिङमा नेपालका करण केसीले ४ विकेट लिए।त्यस्तै सोमपाल कामी र अभिनास बोहराले २–२ विकेट लिए।
