एजेन्सी । इजरायलसँग चलिरहेको युद्धको बीचमा हमासले दुई अमेरिकीलाई रिहा गरेको छ। जसमा एक महिला र उनकी छोरी रहेका छन् ।
दुई साताअघि अक्टोबर ७ मा इजरायलमा हमलापछि हमासले दुवैलाई बन्धक बनाएको थियो ।
हमासले रिहा गरेका अमेरिकी आमा छोरीसँग पनि इजरायली नागरिकता रहेको छ ।
यी दुवै अमेरिकीहरू हाल इजरायली अधिकारीहरूसँग इजरायलमा सुरक्षित छन्।
हमासले कतार सरकारसँगको सम्झौताअनुसार उनीहरुलाई रिहा गरेको बताएको छ ।
अमेरिकाले आफ्ना नागरिकको रिहाइको स्वागत गरेको छ । अमेरिकी विदेशमन्त्री एन्टोनी ब्लिन्केनले उनको रिहाइको स्वागत गरेको बताएका छन् ।
तर यस युद्धमा अझै १० अमेरिकी नागरिक बेपत्ता छन्। ती मध्ये केहीलाई हमासले बन्धक बनाएको हुन सक्छ। ब्लिन्केनका अनुसार हमासले अझै पनि २०० भन्दा बढी मानिसहरूलाई बन्धक बनाएको छ। यसमा धेरै देशका पुरुष, महिला, युवा केटा, केटी, वृद्धवृद्धा समावेश छन्।
