एजेन्सी । इजरायल र हमासबीच युद्ध जारी छ। हमासले अक्टोबर ७ मा इजरायलमा कडा आक्रमण गरेको थियो । निर्दोष इजरायली नागरिकको हत्या पछि, उनीहरूले धेरै मानिसहरूलाई बन्धक बनाएका थिए।
यो घटनापछि इजरायलले गाजा पट्टीमा भिषण हमला गर्दै आइरहेको छ । हमासका धेरै ठाउँहरु ध्वस्त भएका छन् । यो कारबाही निरन्तर जारी छ ।
यसैबीच, बिहीबार केही घन्टासम्म इजरायली सैनिक र ट्याङ्कहरू गाजा सीमामा प्रवेश गरी विनाश मच्चाएर फर्किएका थिए ।
यी सबै बीचमा इजरायलको शत्रु मानिएको र हमास समर्थक इरानले इजरायललाई खुला चेतावनी दिएको छ । इरानले इजरायली सैनिक गाजामा प्रवेश गरे उनीहरुलाई त्यहीँ गाड्ने चेतावनी दिएको छ ।
इजरायल र हमासबीच २० दिनदेखि युद्ध चलिरहेको छ । एक मोर्चामा हमास अर्को मोर्चामा लेबनानको आतंकवादी संगठन हिजबुल्लाहका लडाकुहरू रहेका छन् । उनीहरुले उत्तरी इजरायलमा आक्रमण गरिरहेका छन्।
हिजबुल्लाहलाई इरानको समर्थन छ। यसैबीच, इरानको इस्लामिक रिभोलुसनरी गार्ड कोरका कमाण्डर इन चीफ जनरल होसेन सलामीले इजरायलले बम विस्फोट बाहेक केही गर्न नसक्ने बताएका छन्।
उनले चेतावनी दिदैँ भनेका छन्,’ यदि इजरायली सैनिक गाजाको भूमिमा आए भने, उनीहरुलाई त्यही गाडिनेछ । त्यसैले उनीहरुसँग बाहिरिने बाटो छैन । उनीहरूले अपराध गरेर क्षतिपूर्ति दिन सक्छन् भन्ने भ्रममा रहेका छन् ।’
