काठमाडौँ । नेपाल सरकारका गृहमन्त्री नारायणकाजी श्रेष्ठले देशमा राजा आउँछन् भने सोँच्नु दिवा सपना भएको बताएका छन् ।
चितवनको भरतपुरमा पत्रकारसँग कुराकानी गर्दै गृहमन्त्री श्रेष्ठले उक्त धारणा व्यक्त गरेका हुन् ।
उनले भने, ‘राजा आउँ देश बचाउ भनेर नारा लगाउनेलाई नै राजा आउँछन् भन्ने विश्वास छैन त्यसैले अव देशमा राजा आउँछन् भन्ने सोच्नु दिवा स्वप्न हो । इतिहास फर्केर आउँदैन अगाडि बढेको व्यवस्था अगाडि जान्छ ।’
उनले अगाडि भने, गणतन्त्रमा विरोध गर्न पाइन्छ तर अहिले आएको विरोधले व्यवस्थामा चुनौती आउँदैन भन्ने हामीले लिएका छौ । गणतन्त्रलाई नै असर गर्ने गरी विरोध भएमा हामीले त्यही समयमा निर्णय लिने छौँ ।’
समाजलाई व्यवस्थित पार्दै लैजाने र अराजकतालाई नियन्त्रण गर्ने उनले बताए । जनताको आवश्यकता र चाहनालाई भने सम्बोधन गर्नु पर्ने बताउँदै जनताको आवश्यकतालाई मध्यनजर गरेर काम गर्न सरकार प्रतिबद्ध रहेको मन्त्री श्रेष्ठको भनाई छ ।
