एनएसएलमा आज खेल नहुने

काठमाडौँ। त्रिपुरेश्वरस्थित दशरथ रंगशालमा भइरहेको नेपाल सुपर लिग (एनएसएल)मा आज खेल नहुने भएको छ। त्रिभुवन विश्वविद्यालयको दीक्षान्त समारोहका कारण एनएसएलका खेलहरु प्रभावित भएको हो।

त्रिविको दीक्षान्त समारोहका लागि पुस १ र २ गते रंगशाला माग भएपछि एनएसएलको खेल तालिका प्रभावित भएको हो। एनएसएलको आयोजक नेपाल स्पोर्ट्स एण्ड इभेन्ट म्यानेजमेन्टका अनुसार दीक्षान्त समारोहका कारण दुई दिनको खेल तालिका परिवर्तन भएको हो।

आजको लागि तय भएको काठमाडौँ रेजर्स र धनगढी एफसीबीचको खेल सोमबार साँझ ६ बजेका लागि सारिएको छ।

त्यस्तै, सोमबार ५ बजे तय भएको स्पोर्टिङ इलाम र ललितपुर सिटी एफसीको खेल मंगलबार दिउँसो १ बजे हुने भएको छ। जसले गर्दा मंगलबार दुई खेल हुनेछन्। यी दुई खेल बाहेक अन्य खेल भने पुरानै तालिका अनुसार हुनेछ।