काठमाडौँ । आगामी आवको बजेटमा अनधिकृत व्यक्तिको संलग्नतामा करको दर हेरफेर गरिएको विषयले आज निर्धारित समयमा बस्नुपर्ने प्रतिनिधिसभाको बैठक अहिलेसम्म बस्न सकेको छैन ।
प्रमुख प्रतिपक्षी दल नेकपा (एमाले) र राष्ट्रिय प्रजातन्त्र पार्टी (राप्रपा)ले करको दर हेरफेरमा अनधिकृत व्यक्तिको संलग्नतासम्बन्धी विषयमा सरकारको जवाफ माग गर्ने भएका छन् ।
प्रतिनिधिसभा बैठक अगाडि सभामुख देवराज घिमिरेसहित सबै राजनीतिक दलका प्रमुख सचेतक र सचेतकहरुको बैठकमा एमाले र राप्रपाका नेताहरुले यस्तो जानकारी गराएका हुन् ।
यद्यपि, उक्त विषयको वास्तविकता फरक रहेको भन्दै सत्तारुढ दलहरुले प्रतिवाद गरेका छन् । सोमबार अर्थ मन्त्रालयले एक विज्ञप्ति जारी गरी प्राविधिकरुपमा जान्ने भएका कारण ती व्यक्तिलाई बजेट टाइप गर्न संलग्न गराइएको स्पष्ट पारेको छ ।
सत्तारुढ र प्रतिपक्षी दलहरुको यही विवाद र छलफल लम्बिएका कारण बिहान ११ बजे बस्ने तय भएको प्रतिनिधिसभाको बैठक अहिलेसम्म बस्न नसेको हो । प्रतिनिधिसभामा सोमबारदेखि सुरु भएको राजस्व र व्ययको वार्षिक अनुमानमाथि सैद्धान्तिक छलफल आज पनि जारी रहनेछ ।
अर्थमन्त्री डा प्रकाशशरण महतले यही जेठ १५ मा संघीय संसदको दुवै सदनको संयुक्त बैठकमा आगामी आर्थिक वर्षको वार्षिक राजस्व र व्ययको अनुमान प्रस्तुत गरेका थिए ।
