बालकुमारी घटनालगायत प्रश्नको जवाफ दिन सभामुखको ध्यानाकर्षण

काठमाडौँ । सभामुख देवराज घिमिरेले संसद्‌मा उठाइएको बालकुमारी घटनालगायत प्रश्नको जवाफ आउँदो बैठकमा दिन सरकारको ध्यानाकर्षण गराएका छन् ।

सभामुखको ध्यानाकर्षणसँगै सोमबार यसअघि १५ मिनेट स्थगन गरिएको प्रतिनिधिसभा बैठक सञ्चालन भएको छ । विभिन्न माग गर्दै यसअघि प्रमुख प्रतिपक्ष नेकपा एमालेसहित अरू विपक्षी दलले विरोध गरेका थिए । उनीहरूले सरकारको जवाफ र विवादित मन्त्रीको राजीनामा माग गरेका थिए । उनीहरूले विरोध गरेपछि बैठक १५ मिनेटका निम्ति स्थगन गरिएको थियो ।

आउँदो बैठकमा जवाफ दिन सरकारको ध्यानाकर्षण गराउने र कार्यसूचीमा रहेको व्यवस्थापन कार्यअन्तर्गत स्वास्थ्य तथा जनसंख्यामन्त्री मोहनबहादुर बस्नेतले राष्ट्रियसभामा उत्पत्ति भएको विद्युतीय व्यापार विधेयक, २०८० प्रस्तुत नगर्ने सहमति भएपछि बैठक सञ्चालन गर्न एमाले सहमत भएको हो ।

बैठक सञ्चालनपश्चात् सभामुख घिमिरेले कार्यसूचीअन्तर्गत रहेको तीन नम्बरको विषय हटाइएको जानकारी दिए ।