काठमाडौँ । आफ्नो परिचय लुकाउन भर्चुअल प्राइभेट नेटवर्क भीपीएन प्रयोग गरेर फेक आईडी बनाएर नाबालिगलाई हैरानी दिएको आरोपमा एक जना पक्राउ परेका छन् ।
प्रहरीको साइबर ब्यूरोका एसपी दिपकराज अवस्थीका अनुसार, पक्राउ पर्नेमा सिन्धुपाल्चोक स्थायी घर भइ काठमाडौँको गोल्खुपाखामा बस्दै आएका २२ वर्षीय सुमन खत्री छन् ।
उनका अनुसार, खत्रीले सामाजिक सञ्जाल फेसबुकमार्फत नाबालिगले पोष्ट गरेको फोटोहरु डाउनलोड गरेर नक्कली आईडी बनाएका थिए । त्यसपछि उनले पीडितको फोटो प्रयोग गरेर अश्लील क्याम्सन लेखेको पाइएको उनले बताए ।
अनुसन्धानका क्रममा ब्यूरोबाट खटिएको टोलीले उनलाई गोल्खुपाखा, ठमेलबाट पक्राउ गरेको उनले बताए । विद्युतीय अपराध ऐनविरुद्धको कसूरमा अनुसन्धानका लागि उनलाई ५ दिन हिरासतमा राख्न अदालतले समेत अनुमति दिइसकेको छ ।
घटनाबारे प्रहरीले थप अनुसन्धान गरिरहेको छ ।
