काठमाडौँ । नेकपा एकीकृत समाजवादीका अध्यक्ष माधवकुमार नेपालले सबै कम्युनिस्टलाई गोलबन्द गरिने भए पार्टी एकताका निम्ति तयार रहेको बताएका छन् ।
शुक्रबार पार्टीका महिला भेला तथा प्रशिक्षण कार्यक्रममा उनले आफूलाई पद ओगट्ने चाहना पनि नभएको बताएका हुन् ।
‘हामी सिंगै देशका कम्युनिस्टलाई मिलाउने हो, मिलाउन तयार छौँ । सबै कम्युनिस्टलाई गोलबन्द गर्न तयार हुनुहुन्छ भने तयार छौँ । देश बनाउनुछ हामीलाई । हामीलाई कुनै पद ओगटेर बस्नु छैन,’ उनले भने, ‘हामीलाई प्रधानमन्त्री पद पनि चाहिएको होइन । पार्टी अध्यक्ष पद पनि चाहिएको होइन । हामीलाई खालि देशको प्रगति र परिवर्तन चाहिएको हो ।’
उनले पार्टी छाडेर नेकपा एमालेमा फर्किएका मुकुन्द न्यौपानेलगायत नेताको बिजोग रहेको भन्दै सोचेर मात्र बोल्न आग्रह गरेको सुनाए ।
उनले विभिन्न विषयमा कसरी अघि बढ्ने भनेर छलफल चल्ने बताए ।
