लागुऔषध कोकिन सहित ठमेलबाट २ ब्राजिलियन पक्राउ

काठमाडौँ । ठमेलबाट लागुऔषध कोकिनसहित २ जना ब्राजिलियन नागरिक पक्राउ परेका छन् ।

काठमाडौँ महानगरपालिका १७ ठमेलस्थित एक होटलबाट ब्राजिलियन नागरिक लारिसन ब्रिटो डोस सान्तोस र फेर्नान्डा भले दोसलाई लागुऔषध नियन्त्रण ब्युरोले बुधबार राति पक्राउ गरेको हो ।

लारिसको सुडकेसमा ६२ वटा प्लास्टिकले बेरिएको अवस्थामा कोकिन ५५० ग्राम र १३९ वटा क्याप्सुलमा कोकिन १ किलो ३९० ग्राम बरामद गरेको ब्युरोले जनाएको छ ।

उनीहरुले ब्राजिलको सापाउलोबाट कोकिनको क्याप्सुल निलेर पेटमा लुकाई ल्याएको खुलेको छ । उनीहरूको पेटमा थप क्याप्सुल हुन सक्ने आशंकामा प्रहरीले प्रहरी अस्पताल लगेको थियो । लारिसनको पेटबाट थप ६ वटा क्याप्सुल बरामद भएको ब्युरोका प्रवक्ता एसपी रामेश्वर कार्कीले बताए ।

उनीहरूबाट बरामद भएको कोकिनको मूल्य ४ करोड ३६ लाख ५० हजार रुपैयाँ मर्ने प्रहरीको भनाइ छ । दुवै जनाविरुद्ध लागुऔषध कारोबारको कसुरमा अदालतबाट शुक्रबार म्याद लिएर प्रहरीले अनुसन्धान अगाडि बढाएको छ ।