गण्डकीका सांसद फणीन्द्र देवकोटालाई संसद प्रवेशमा रोक

पोखरा । सर्वोच्च अदालतको आदेशपछि प्रदेशसभा पुगेका गण्डकीका सांसद फणीन्द्र देवकोटालाई रोक लगाइएको छ । बिहीबार प्रदेशसभा गएका देवकोटालाई मर्यादा पालकले रोक लगाएका हुन् ।

सर्वोच्च अदालतले आदेश दिएकाले आफू प्रदेशसभामा आएको तर, आफूलाई बैठकमा प्रवेश गर्न रोक लगाइएको सांसद देवकोटाले जानकारी दिए ।

मुख्यमन्त्री सुरेन्द्रराज पाण्डेलाई ‘फ्लोर क्रस’ गरेर विश्वासको मत दिएपछि उनलाई नेकपा माओवादी केन्द्रले कारबाही गरेको थियो । आफू नेपाल समाजवादी पार्टी भएकाले माओवादी केन्द्रले कारबाही गर्न नमिल्ने भन्दै उनी सर्वोच्च अदालत पुगेका थिए । सर्वोच्चले सोमबार उनको पक्षमा अन्तरिम आदेश दिएको थियो ।