काठमाडौं । राष्ट्रिय स्वतन्त्र पार्टी (रा.स्व.पा.) सभापति रवि लामिछानेलाई आज(मंगलबार) काठमाडौं ल्याइँदैछ ।
सहकारीको रकम अपचलन गरेको आरोपमा कास्की प्रहरीको हिरासतमा रहेका लामिछानेलाई विमान बाट काठमाडौं ल्याउन लागिएको हो । आइतबार मात्रै उनलाई कास्की जिल्ला अदालतले १५ दिनको म्याद थपेको छ । काठमाडौंमा भने स्वर्णलक्ष्मी सहकारीको रकम पनि गोर्खा मिडिया प्रा.लि.मा गएको र हिनामिना भएको भन्दै अनुसन्धानका लागि लामिछानेलाई काठमाडौं ल्याउन लागिएको हो ।
पोखराको सूर्यदर्शन सहकारी सँग सम्बन्धित बयान सकिएकाले काठमाडौंको कालिमाटी स्थित स्वर्णलक्ष्मी सहकारी ठगी सँग सम्बन्धित रहेर थप बयान लिन उनलाई काठमाडौं ल्याउन लागिएको हो । उनी विरुद्ध काठमाडौं जिल्ला अदालतले पक्राउ पुर्जी जारी गरिसकेको छ ।
बयान सकिएपछि लामिछानेलाई पुनः कास्की नै लगिनेछ । लामिछाने विरुद्ध चितवनमा पनि पक्राउ पुर्जी जारी भएको छ । उनलाई चितवन पनि लैजाने तयारी छ । उनलाई कात्तिक २ गते काठमाडौंको वनस्थली स्थित राष्ट्रिय स्वतन्त्र पार्टीको केन्द्रीय कार्यालय बाट पक्राउ गरिएको थियो ।
कात्तिक ४ गते जिल्ला अदालत कास्की पेस गरिएपछि उनलाई बयानका लागि रुपन्देही पनि पुर्याइएको थियो । कास्कीमा लामिछाने माथि सहकारी ठगी, संगठित अपराध र सम्पत्ति शुद्धीकरण सम्बन्धी कसुरमा अनुसन्धान भइरहेको छ ।
