एजेन्सी । इन्डियन प्रिमियर लिग (आईपीएल)को १६ औं सिजनमा लिग राउण्डका खेलहरु सकिएका छन् । ७० खेलपछि प्लेअफका चार टोलीको टुंगो लागेको छ ।
लिग राउण्डको अन्तिम खेलमा गुजरात टाइटन्सले रोयल च्यालेन्जर्स बैंगलोरलाई पराजित गर्यो । यो हारपछि आरसीबी टोली प्रतियोगिताबाट बाहिरिएको छ । उसको प्लेअफ पुग्ने सपना चकनाचुर भयो । यता, आरसीबीको पराजयको फाइदा उठाउँदै मुम्बई इन्डियन्सले अन्तिम ४ मा स्थान बनाएको छ ।
आइतबार गुजरात र आरसीबीबीचको खेलअघि मुम्बई इन्डियन्स र सनराइजर्स हैदरावादबीचको खेल खेलिएको थियो । यो खेलमा मुम्बईले क्यामरुन ग्रीनको शतकको मद्दतले जित निकाल्यो । यो प्रतियोगितामा मुम्बईको आठौं जित हो । उसले राजस्थान रोयल्स र आरसीबीलाई पछि पार्दै चौथो स्थानमा पुग्यो ।
यदि आरसीबीले आफ्नो खेलमा गुजरातलाई हराएको थियो भने, उसले मुम्बईको बराबर १६ अंक पाउने थियो र राम्रो नेट रनरेटका साथ प्लेअफमा पुग्ने थियो । तर, त्यसो हुन सकेन र आरसीबी पराजित हुन पुग्यो । मुम्बईले उसको हारबाट फाइदा उठाउँदै प्लेअफको टिकट पायो ।
अंक तालिकाको शीर्ष स्थानमा गुजरात टाइटन्स रह्यो । उसले १४ मध्ये १० खेल जित्यो । २० अंकसहित गुजरात पहिलो स्थानमा छ । चेन्नई सुपर किंग्स र लखनउ सुपर जायन्ट्सले आठ–आठ खेल जिते । दुईबीचको एक खेल रद्द भएको थियो । यसरी चेन्नई र लखनउको १७–१७ अंक छ । चेन्नई राम्रो नेट रनरेटको आधारमा दोस्रो स्थानमा रह्यो । लखनउले तेस्रो स्थान हासिल गर्यो । मुम्बईले आठ जितबाट १६ अंक जोड्दै चौथो नम्बरमा उभियो ।
प्लेअफको कुरा गर्दा सबैभन्दा पहिले क्वालिफायर–१ मा गुजरात टाइटन्स र चेन्नई सुपर किंग्सबीच भिडन्त हुनेछ । यो खेल चेन्नईको घरेलु मैदान चेपौक स्टेडियममा हुनेछ । यसपछि चेन्नईमा नै मुम्बई इन्डियन्स र लखनउ सुपरजायन्ट्सबीच एलिमिनेटर खेल हुनेछ ।
क्वालिफायर–१ मा हारेको टोली र एलिमिनेटर खेल जितेको टोलीबीच क्वालिफायर–२ खेलाइनेछ । यस खेलको विजेता टोलीले क्वालिफायर–१ को विजेतासँग फाइनल खेल्नेछ ।
खेल तालिकाः
गुजरात टाइटन्स भर्सेस चेन्नई सुपर किंग्स, मंगलबार – ७ः४५ बजे
लखनउ सुपरजायन्ट्स भर्सेस मुम्बई इन्डियन्स, बुधबार – ७ः४५ बजे
