एजेन्सी । अमेरिकाको लस एन्जलस क्षेत्रमा लागेको डढेलोका कारण ५ जनाको मृत्यु हुनुका साथै हजारौं संरचना ध्वस्त हुँदा लाखौं विस्थापित भएका छन् ।
मंगलबार पालिसेड बाट शुरु भएको आगोले त्यसै क्षेत्रमा सबै भन्दा बढी क्षति गरेको हो। लाखौं मानिस घर छाड्न बाध्य भएका छन्। लस एन्जलसमा फैलिएको आगो नियन्त्रण बाहिर गएको हो ।
अन्तर्राष्ट्रिय सञ्चार माध्यमका अनुसार जङ्गल बाट फैलिएको आगो बस्तीमा आए पछि ठूलो रूप लिएको हो । सरकारले १ लाख ५० हजार जना मानिसलाई सुरक्षित ठाउँमा स्थानान्तरण को आदेश दिएको छ । आगलागीका कारण करिब १५०० संरचनामा क्षति पुगेको छ । आगोले बस्तीका कैयौं घर, महँगा सम्पत्ति, कार लगायतका संरचना खरानी बनाएको छ ।
जङ्गल बाट ५० किलोमिटर भित्रको बस्ती सम्म आगो पुगेको छ । एक हजार एकड क्षेत्रफल आगोले ध्वस्त भएको समाचारमा उल्लेख छ । आगलागीका कारण दुई लाख २० हजार मानिसको घरमा बिजुली कटौती भएको छ । दमकल र हवाईजहाज तथा हेलिकप्टरको साथमा सयौं अग्नि नियन्त्रक आगो निभाउन खटिएका छन् ।
सुक्खा वातावरण र तीव्र गतिमा हावा चलेका कारण आगो निभाउने काम कठिन बन्दै गएको अग्नि नियन्त्रकले बताएका छन् ।
