नवलपरासी । नवलपरासीको गैँडाकोटमा रहेको भृकुटी कागज कारखाना विगत १४ वर्षदेखि पूर्णरुपमा बन्द हुँदा कारखानाका भवनहरु भत्किएर भग्नावशेषमा परिणत हुँदै गइरहेको छ ।
नगरको बीच भागमा रहेको यस कारखानाको व्यवस्थापनमा सरकारले चासो नदिँदा उद्योगका मेसिनरी उपकरण तथा करोडौँका संरचना खेर गइरहेको स्थानीय बताउँछन् । उद्योग सञ्चालनको बेला यस उद्योगबाट उत्पादित कागजले मुलुकको आधा माग धान्ने गरेकोमा अहिले उद्योग भग्नावशेषमा परिणत हुँदैछ ।
उद्योगको यन्त्र उपकरण राखिएको भवनको छानो खिया लागेर खसेका छन् भने यन्त्र उपकरण खियाले मक्किदै गएका छन् । करिब २२ बिघा क्षेत्रफलमा फैलिएको उद्योगलाई झाडीले ढाकेको अवस्थामा छ । उद्योग भित्रका भवनमा समेत झार उम्रिएर भवन काम नलाग्ने अवस्थामा पुगेका छन् ।
यस उद्योगलाई सञ्चालन गर्ने भन्दै गण्डकी प्रदेश सरकारको सांसद् तथा संसदीय समितिले एवम् सङ्घीय सांसदलेसमेत पटक पटक उद्योगको स्थलगत अवलोकन गरे पनि उद्योग सञ्चालनमा आउन सकेको छैन ।
उद्योग बन्द हुँदा अर्बौँको सामानहरु मक्किदै गएका छन् भने उद्योग बन्द भएपछि चार सय भन्दा बढी श्रमिकले पाउनुपर्ने पारिश्रमिक समेत पाएका छैनन् ।
