चलाउनेमाथि आक्रमण गर्नेहरुविरुद्धको मुद्दा फिर्ता नगर्न सर्वोच्चको आदेश

काठमाडौँ। सर्वोच्च अदालतले उपप्राध्यापक प्रेम चलाउनेमाथि आक्रमण गर्नेहरु विरुद्धको मुद्दा फिर्ता लिने सरकारको निर्णय कार्यान्वयन नगर्न आदेश दिएको छ।

सरकारले आक्रमणकारीविरुद्धको मुद्दा फिर्ता लिएपछि आफू अन्यायमा परेको भन्दै उपप्राध्यापक चलाउनेले दायर गरेको रिटमा सर्वोच्चले निर्णय कार्यान्वयन नगर्न अन्तरकालीन आदेश दिएको हो।

न्यायाधीश मनोजकुमार शर्माको इजलासले बिहीबार रिट सुनुवाई गर्दै मुद्दा फिर्ता लिनुको कारण पेश गर्न समेत सरकारलाई आदेश दिएको छ। अदालतको आदेशसँगै जिल्ला अदालतमा सरकारी वकिलले मुद्दा फिर्ता लिन दिएको निवेदन निस्क्रिय भएको छ। सरकारी वकिलको कार्यालयले आदेश चित्त नबुझे यसलाई खारेजको माग गर्दै सर्वोच्च अदालत जान पाउने प्रावधान छ।

उपप्राध्यापक चलाउनेले मुद्दा फिर्ता लिने सरकारको निर्णय युक्तिसंगत नभएको र अपराधीलाई संरक्षण गर्ने प्रकृतिको रहेको भन्दै त्यसविरुद्ध रिट दायर गर्नुभएको हो।