प्रधानमन्त्रीको अभिव्यक्तिलाई लिएर एमालेले विरोध गर्ने

काठमाडौँ। प्रमुख प्रतिपक्ष दल नेकपा एमालेले प्रधानमन्त्री पुष्पकमल दाहाल प्रचण्डको अभिव्यक्तिलाई लिएर विरोध गर्ने भएको छ। बुधबार संसद् भवन बानेश्वरमा बसेको पार्टी संसदीय दलले प्रधानमन्त्रीको अभिव्यक्तिको विरोध गर्ने निर्णय गरेको सचेतक महेश बर्तौलाले बताए।

केही दिनअघि प्रधानमन्त्री प्रचण्डले सरदार प्रीतम सिंहको बारेमा अभिव्यक्ति दिएका थिए। प्रचण्डले सार्वभौमसत्ता सम्पन्न संसद्को गरिमाविपरीत गएर अभिव्यक्ति दिएकोले त्यसको विरोध गर्न लागेको बर्तौलाको भनाई छ।

‘१८ गते देशका प्रधानमन्त्रीले देशको विपक्षमा रहेर, देशको सार्वभौमसत्ता सम्पन्न संसद्को गरिमाविपरीत गएर प्रधानमन्त्री संसदले बनाएको होइन, दिल्लीले बनाएको हो भन्नेजस्ता अभिव्यक्ति दिनुभयो। यो अभिव्यक्तिलाई संसदीय दलले गम्भीरतापूर्वक लिएको छ’ उनले भने, ‘आज दिउँसो ३ बजे संसद बैठक छ। आज बसेको हाम्रो बैठकको सार भनेको प्रधानमन्त्रीको अभिव्यक्ति संसदमाथिको अपमान नै हो। जनादेशमाथि गरेको अपमान हो। यो देशको सार्वभौमत्तामाथि गरेको आक्रमणको कुरा सदनमा राख्नेछौं।’