काठमाडौं । नेपाली पब्जी मोबाइल टिम डीआरएस गेमिङ ‘पब्जी मोबाइल वर्ल्ड इन्भिटेसनल २०२३’ अर्थात् पीएमडब्लूआईमा भाग लिन साउदी अरेबिया प्रस्थान गरेको छ ।
४० करोड रुपैयाँभन्दा बढीको पुरस्कार राशि भएको सो प्रतियोगिता खेल्न डीआरएस शनिबार साउदीको राजधानी रियाद प्रस्थान गरेको हो ।
अलस्टार्स स्टेज दक्षिण एसिया स्तरको भोटिङमा सबैभन्दा धेरै भोट पाएर डीआरएस पीएमडब्लूआईका लागि चयन भएको हो । यो प्रतियोगिताको कूल पुरस्कार राशि ४० करोड नेपाली रुपैयाँभन्दा बढी छ ।
पीएमडब्लूआई अलस्टार्स स्टेज र मेन टुर्नामेन्ट गरी दुई चरणमा प्रतियोगित हुँदैछ । यो प्रतियोगितामा ‘डीआरएस गेमिङ’ले जुलाई ११ देखि १३ सम्म चल्ने अलस्टार्स स्टेजको १८ खेल खेल्दैछ, जुन प्रतियोगिताको पहिलो चरण रहेको छ ।
‘डीआरएस गेमिङ’सहित १८ टिम सहभागी रहेको यो खेलको लागि १३ करोड रुपैयाँभन्दा बढी पुरस्कार राशि तोकिएको छ ।
अलस्टार्स स्टेजको खेल सकिँदा अङ्क तालिकाको शीर्ष पाँच टिमले मेन टुर्नामेन्टमा स्थानमा बनाउने छन् । जुन प्रतियोगिताको दोस्रो तथा प्रमुख चरण रहेको छ । यो चरणको खेल १४ जुलाई देखि १६ जुलाईसम्म चल्नेछ ।
मेन टुर्नामेन्टमा पब्जीको नौ क्षेत्रका १० टिम, एक आमन्त्रित टिम र अलस्टार्स स्टेजबाट आएका पाँच टिम गरी कूल १६ टिमले प्रतिस्पर्धा गर्नेछन् ।
‘डीआरएस गेमिङ’ले मेन टुर्नामेन्टमा स्थान बनाउनको लागि अलस्टार्स स्टेज पार गर्नुपर्ने हुन्छ । मेन टुर्नामेन्टका लागि २६ करोड रुपैयाँभन्दा बढी पुरस्कार राशि छुट्याइएको छ । प्रतियोगिता साउदी अरेबियाको राजधानी रियादमा हुनेछ ।
