रुपन्देही। नेकपा एकीकृत समाजवादीका अध्यक्ष माधवकुमार नेपालले ललिता निवास प्रकरणमा आफूलाई अनावश्यक विवादमा ल्याउन खोजिएको बताएका छन्। नेपाल पत्रकार महासंघ पाल्पाले आज तानसेनमा आयोजना गरेको पत्रकार भेटघाट कार्यक्रममा बोल्दै पूर्व प्रधानमन्त्री समेत रहेका नेपालले सो कुरा बताएका हुन्।
नेपालले प्रधानमन्त्री हुँदैमा सबै विषयको दोषी हुने र त्यसको सबै अपजस लिनुपर्ने भन्ने नहुने उनको भनाई छ।
‘यो प्रकरणको उचित छानबिन हुनुपर्छ, मेरो पनि नाम जोडिएको छ। मसहित धेरै पूर्व प्रधानमन्त्रीको नाम जोडिएको छ। अनावश्यक विवादमा तान्ने प्रयास भएको छ,’ नेपालले भने, ‘म छानबिनको विरोधी होइन तर गलत प्रचार गर्न त भएन नि। उचित छानबिन गरी दोषीलाई कारबाही हुनुपर्छ। यसलाई छिटो टुंगो लगाउनुपर्दछ।’
यो प्रकरणमा नाम जोडिएर आफू नआत्तिएको उल्लेख गर्दै उनले खाएको विष मात्रै लाग्ने बताए।
नेपालले बालुवाटारस्थित ललिता निवास र त्यसले चर्चेको सरकारी जग्गा हिनामिना प्रकरणमा कसुर देखिएका दोषीलाई कारबाही हुनुपर्ने बताए।
