ललिता निवास प्रकरणमा थप एक जना पक्राउ

काठमाडौँ। बालुवाटारमा रहेको ललिता निवासको सरकारी जग्गा हिनामिना प्रकरणमा थप एक जना पक्राउ परेका छन्।

समरजंग कम्पनीका तत्कालीन सहलेखापाल विनोद पौडेललाई काठमाडौँको चावहिल क्षेत्रबाट पक्राउ गरेको केन्द्रीय अनुसन्धान ब्युरो (सीआईबी)ले जनाएको छ। यसअघि यही कम्पनीका तत्कालीन प्रमुख लोकहरि घिमिरे र रमेशकुमार पोखरेल पक्राउ परिसकेका छन्।

ललिता निवासको एक सय ४३ रोपनी जग्गाको जग्गाधनी गृह मन्त्रालय मातहतको समरजंग कम्पनी थियो। तर दर्ता स्रेस्ता सच्याएर यो जग्गा विभिन्न गुठी र व्यक्तिको नाममा नामसारी गरेर अनियमितता गरेको प्रहरीको दाबी छ।