काठमाडौं । श्रीलंकामा जारी एसीसी मेन्स इमर्जिङ टिम्स एसिया कप प्रतियोगिता अन्तर्गत नेपालले आज शुक्रबार पाकिस्तान ‘ए’ सँग प्रतिस्पर्धा गर्दैछ ।
नेपाल र पाकिस्तानबीचको खेल कोलम्बो क्रिकेट क्लबको मैदानमा नेपाली समय अनुसार बिहान १०ः१५ बजे सुरु हुनेछ । पाकिस्तान राष्ट्रिय टोलीबाट खेलिसकेका मोहम्मद हरिसको कप्तानीमा पाकिस्तान ए टोली रहेको छ । नेपाल भने रोहित पौडेलको कप्तानीमा मैदान उत्रदैछ ।
गत मेमा नेपालमा भएको एसीसी प्रिमियर कपको विजेता बन्दै नेपालले इमर्जिङ कपका लागि स्थान बनाएको हो । टेस्ट राष्ट्र पाकिस्तान भने स्वतः छनोट भएको हो ।
नेपालले दोस्रो खेलमा सोमबार भारत ‘ए’ सँग खेल्नेछ । नेपालले समूह चरणको अन्तिम खेलमा बुधबार युएई ‘ए’ सँग खेल्नेछ ।
६ टोली सहभागिता रहेको टोलीहरुलाई दुई समूहमा विभाजन गरिएको छ । हरेक समूहका शिर्ष दुई टोली सेमिफाइनल पुग्नेछन् । सेमिफाइनल खेल २१ जुलाईमा हुनेछ ।
सेमिफाइनलका दुई विजेता टोलीले उपाधिका लागि प्रतिस्पर्धा गर्नेछन् । फाइनल खेल २३ जुलाईमा हुनेछ ।
