काठमाडौँ। प्रधानमन्त्री पुष्पकमल दाहाल प्रचण्डविरुद्ध सामाजिक सञ्जालमा लेखेपछि बुटवलबाट एक युवा पक्राउ परेका छन्। प्रधानमन्त्री प्रचण्डकी पत्नी सीता दाहालको निधनसँग जोडेर सामाजिक सञ्जालमा असंवेदनशील कुरा लेखेको आरोपमा नेपाल प्रहरी साइबर ब्युरोले बुटवलको देबीनगरबाट शेरबहादुर राना मगरलाई पक्राउ गरेको हो।
ब्युरोको टोलीले काठमाडौँबाट लोकेशनको खोजी गर्दै बुटवल पुगेर रानालाई पक्राउ गरेर लगेको हो। इलाका प्रहरी कार्यालय बुटवलको सहयोगमा रानालाई पक्राउ गरिएको स्रोतले दाबी गरेको छ।
मगरले प्रधानमन्त्री पत्नी सीता दाहालको निधनबारे सामाजिक सञ्जालमा असंवेदनशील कुराहरू लेखेको आरोपमा उनलाई पक्राउ गरिएको ब्युरो स्रोतले जनाएको छ।
‘अरूलाई विधवा बनाएर अब आफ्नो पनि त्यस्तै हो ‘‘’ भन्ने खालको कुरा जोडेर लेखेको अभियोगमा छाबिन गर्दा रानाले सो स्टाटस पोष्ट गरेको देखिएपछि पक्राउ गरिएको स्रोतको दाबी छ। त्यस्तै मगरमाथि प्रधानमन्त्री प्रचण्डको तस्बिर जोडेर भारतीय आधार कार्ड, आयकर कार्ड लगायत नक्कली विवरणसहितको तस्बिर सामाजिक सञ्जालमा राखेको आरोप पनि प्रहरीले लगाएको छ।
आइतबार साँझ पक्राउ गरेको रानालाई ब्युरो टोलीले उनलाई आज काठमाडौँ लगेको स्रोतले बतायो।
