सिड्नी। अष्ट्रेलिया सरकारले अन्तर्राष्ट्रिय विद्यार्थीका लागि भिसासम्बन्धी केही नियमहरुमा परिवर्तन गरेको छ। अष्ट्रेलिया सरकारले आगामी २ वर्षका लागि प्रवासी कामदार र अन्तर्राष्ट्रिय विद्यार्थीहरूलाई अष्ट्रेलिया प्रवेशमा कडाई गरेको हो।
नयाँ नीति अनुसार प्रवासी विद्यार्थीले अब अंग्रेजी परीक्षामा उच्च अंक ल्याउनुपर्ने भएको छ। विद्यार्थीले अष्ट्रेलिया बसाई लम्ब्याउन दिने दोस्रो भिसा आवेदनको प्रक्रियामा पनि थप कडाई गरिनेछ।
अष्ट्रेलिया गृहमन्त्री क्लेर ओ’निलले सोमबार पत्रकार सम्मेलनमा आगामी दुई वर्षमा आप्रवासीको आगमन आधामा झार्न विदेशी विद्यार्थी र अल्पसीप भएका कामदारका लागि दिइने भिसा नियम कसिलो बनाउन लागिएको बताएकी छन्।
त्यहाँ अहिले आप्रवाशीको संख्या बढेर ५ लाख १० हजार रहेको छ। त्यो अहिलेसम्मकै सर्वाधिक सङ्ख्या हो। आधिकारीक आंकडाका अनुसार २०२४–२५ देखि २०२५–२६ सम्म घटेर एक चौथाई मिलियनमा झर्ने अपेक्षा गरिएको छ ।
२०२२–२३ मा ठूलो संख्यामा अष्ट्रेलियामा विदेशी विद्यार्थी र कामदार भित्र्याइएको थियो। अब त्यससलाई कोभिड महामारी अघिको अवस्थामा फर्काउन विदेशी विद्यार्थी र न्यून सीप भएका कामदारलाई दिने भिसामा कडाई गरिने भएको हो।
