सिड्नी । अष्ट्रेलियामा सोनाम ल्होसार मनाइएको छ । एडिलेडसहित अष्ट्रेलियाका विभिन्न शहरहरुमा सोनाम ल्होछार मनाइएको हो ।
मञ्जुश्री पात्रोअनुसार शनिबारबाट २८६० औं वर्ष सुरु भएको छ । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ। पर्वको अवसरमा एक कार्यक्रमको आयोजना गरी तामाङ सोसाइटी अफ साउथ अष्ट्रेलियाले खरायो वर्षलाई बिदाई गरी ड्रागन (मेघ) वर्षलाई स्वागत गरेको हो ।
सोसाईटीकी अध्यक्ष अनु घिसिङको सभापतित्वमा भएको कार्यक्रममा तामाङसहितका नेपालका विविधता झल्कने सांस्कृतिक प्रस्तुतिहरु प्रस्तुत गरिएको थियो। सोसाइटीले २०१३ देखि एडिलेडमा सोनाम ल्होसार मनाउँदै आएको छ ।
घिसिङले प्रवासमा पनि मौलिक संस्कृतिको संरक्षण र प्रचार प्रसारका लागि कार्यक्रम आयोजना गरिएको बताइन् । कार्यक्रममा ऐतिहासिक र सांस्कृतिक महत्व राख्ने भाक्पा नृत्य प्रदर्शन गरिएको थियो । नृत्यलाई गुरु रिम्पोचेको नृत्यका रुपमा लिने गरिन्छ ।
यसैगरी सिड्नी, मेलवर्न तथा पर्थमा समेत विविध सास्कृतिक कार्यक्रम गरेर सोनाम ल्होसार मनाइएको तामाङ सोसाइटीका अगुवा छेदा लामाले जानकारी दिए ।
