काठमाडौँ। राष्ट्रपति रामचन्द्र पौडेलले नेपालमा कृषि, पर्यटन र ऊर्जा क्षेत्रमा लगाानी गर्न अन्तर्राष्ट्रिय उद्योगी–व्यापारीलाई आह्वान गरेका छन्।
एसिया प्रशान्त क्षेत्रीय उद्योग वाणिज्य परिसंघ (क्यासी) र नेपाल उद्योग वाणिज्य महासंघ (एफएनसीसीआई)को संयुक्त आयोजनामा काठमाडौँमा आयोजित दुई दिने क्यासी सम्मेलनको सोमबार बिहान काठमाडौँमा उदघाटन गर्दै राष्ट्रपति पौडेलले त्यस्तो आह्वान गरेका हुन्।
‘नेपालमा लगानीको वातावरण निर्माण हुँदैछन्। लगानी सहज बनाउने कानुनहरु निर्माण भैरहेका छन्, म कृषि, पर्यटन र उर्जा क्षेत्रमा लगाानीका लागि अन्तर्राष्ट्रिय उद्योगी–व्यापारीलाई आह्वान गर्दछु।’ राष्ट्रपति पौडेलले सम्मेलन समुद्घाटनका क्रममा भने।
पौडेलले नेपालमा विद्युतका क्षेत्रमा धेरै सम्भावना र अवसर रहेको भन्दै त्यसतर्फ लगानी बढाउन आह्वान गरे। नेपाली विद्युतको बजार भारत र बंगलादेशमा पनि सुनिश्चित बन्दै गएको भन्दै राष्ट्रपति पौडेलले भने, ‘विद्युत व्यापारका क्षेत्रमा पछिल्ला दिनमा भएका प्रगतिले जलविद्युतमा लगानी गर्न चाहने उद्यमीका लागि महत्वपूर्ण अवसर खोलेको छ। म नेपालको जलविद्युतको क्षेत्रमा लगानी गर्न तपाईंहरू सबैलाई आह्वान गर्दछु।’
आधुनिक युगमा दिगोपन एक शब्दजाल मात्र होइन, यो हाम्रो भविष्यको आधारशिला भएको बताउँदै पौडेलले साना र मझौला उद्यमहरू अर्थतन्त्रको मेरुदण्ड भएको बताए।
उनले उद्यमशीलता भनेको व्यवसाय सुरु गर्नु मात्र नभई नवप्रवर्तनलाई अँगाल्ने, विविधतालाई सघनीकरण गर्ने र समुदायले सामना गर्ने ठूला चुनौती समाधान गर्ने सबैभन्दा बलियो आधार पनि भएको टिप्पणी गरे।
‘तपाईँहरूले यो भावनालाई अगाडि बढाइरहनुभएको छ र बढाइरहनुहुनेछ भन्ने विश्वास व्यक्त गर्दछु”, पौडेलले भने।
राष्ट्रपति पौडेलले भने, “व्यवसाय क्षेत्रका सङ्गठनहरूले व्यापार सहज बनाउन प्रदान गर्ने मध्यस्थता, प्रक्रियाहरूको डिजिटलाइजेसन र सञ्जालीय अवसरलगायतका सेवा व्यवसायलाई संसारसँग जोड्ने औजार हुन्। यी गतिविधि कारोबार मात्र होइनन्, यिनले विश्वव्यापी बहुपक्षीयतावादलाई सबलीकरण गर्न योगदान गर्दछन्। फलस्वरूप पारस्परिक लाभदायक सम्बन्धमार्फत विश्वव्यापी शान्तिलाई बलियो बनाउन योगदान गर्नेछ।”
