तेस्रो पटक ‘सर्किट ब्रेक’ लागेपछि आजको लागि शेयर बजार कारोबार बन्द

काठमाडौँ। तेस्रो पटक ‘सर्किट ब्रेक’ लागेपछि आज आइतबारको शेयर बजार कारोबार बन्द भएको छ।

कारोबार खुलेको ५ मिनेटमै ४ प्रतिशतले बजार बढेपछि पहिलो सर्किट ब्रेक लागेको थियो। ११ः २५ मा दोस्रो पटक खुलेको बजारमा २ मिनेटमै ५ प्रतिशत बढेपछि सर्किट ब्रेक लाग्यो र ४० मिनेटका लागि कारोबार स्थगित भयो। पुनः १२ः ०७ बजे सुरु भएको कारोबारमा फेरि २ मिनेटमै अघिल्लो दिनको तुलनामा ६ प्रतिशत बढेपछि तेस्रो सर्किट ब्रेक लागेको हो।

योसँगै आइतबारका लागि शेयर कारोबार बन्द भएको छ। आइतबार शेयर बजारको परिसूचक नेप्से १११ अंक बढेको छ। नेप्से १ हजार ९६३ अंकमा कायम भएको छ। आइतबार ९ मिनेट कारोबार हुँदा जम्मा ४८ करोड २४ लाख रुपैयाँको कारोबार भएको छ।

नेपाल राष्ट्र बैंकले शुक्रबार सार्वजनिक गरेको पहिलो त्रैमासिक मौद्रिक नीति समीक्षामा सेयर धितोमा जाने कर्जाको जोखिमभार १५० प्रतिशतबाट झारेर १२५ प्रतिशत कायम गरेपछि शेयर बजारका लागनीकर्ताहरु उत्साहित भएपछि बजार बढेको हो।