काठमाडौँ । लघुवित्त र सहकारीमा पनि मर्ज आवश्यक भइसकेको सञ्चालकले बताएका छन् । साना किसान विकास लघुवित्त वित्तीय संस्थाका अध्यक्ष खेम पाठकले मर्जरको आवश्यकतामा जोड दिएका हुन् । उनले सहकारी वा लघुवित्त संस्था धेरै भन्दा पनि गुणस्तरीय र स्तरीय हुनुपर्नेमा जोड दिए ।
३५ हजार बढी पुगेको सहकारी संख्या अहिले केही मर्ज भएर ३० हजारमा आएका छन् । अध्यक्ष पाठकले ३० हजार सहकारीमा ५० प्रतिशत सहकारी मात्रै राम्रो रहेको बताए । उनले बाँकी १५ हजार सहकारी नाम मात्र भएको र के काम गरिरहेका छन् भन्ने बारेमा अन्योल रहेको बताए ।
बैंक, वित्तीय संस्था र सहकारीबाट हुने कर्जा एकीकृत सूचना केन्द्र मार्फत हेर्न मिल्ने बनाउन जरुरी रहेको पनि अध्यक्ष पाठकको विश्लेषण छ । अहिलेसम्म सहकारी र लघुवित्त वित्तीय संस्थाहरुबाट हुने कर्जा प्रवाह सूचना केन्द्रमा आउँदैनन् । सरकारले तत्काल बैंक, वित्तीय संस्था र सहकारीबाट हुने कर्जा एकीकृत सूचना केन्द्रमार्फत हेर्न मिल्ने बनाउन जरुरी रहेको उनको भनाइ छ ।
अध्यक्ष पाठकले सरकारले एकीकृत सूचना केन्द्र बनाए अहिले सहकारी र लघुवित्तहरुले कर्जा प्रवाहमा देखिएको समस्या न्यूनीकरण हुनसक्ने बताए ।
