बजेटमा विचौलियाको प्रभाव परेको छैनः अर्थमन्त्री महत

काठमाडौँ। अर्थमन्त्री प्रकाशशरण महतले बजेटमा विचौलियाको प्रभाव नपरेको स्पष्ट पारेका छन्। आज प्रतिनिधिसभा बैठकमा सांसदहरूले उठाएका प्रश्नको जवाफ दिँदै महतले करको दरमा हेरफेर गरेको भन्ने कुरा झुट्टो भएको बताएका हुन्।

अर्थमन्त्री महतले भने, ‘बजेटमा विचौलियाको प्रभावमा परी करमा हेरफेर गर्यो भन्ने आरोप आएको छ त्यो झुट्टो हो म सिस्टममा विश्वास गर्छु।’

अर्थमन्त्री महतले करको दर हेरफेरबारे आफूहरुले नै निर्णय गरेको बताए। यसलाई इन्ट्री गर्न भने पूर्वनायब सुब्बा रामकृष्ण श्रेष्ठलाई सहयोगीका रुपमा लिएको स्वीकार गरे। उनले आफ्नो इमान्दारितामाथि शंका नगर्न आग्रह गरेका छन्।

करको दर हेरफेरबारे आफू सहितका आधिकारिक व्यक्तिहरुले निर्णय गरेको उनले बताए। आफू आउनुभन्दा अगाडि नै सहयोगीका लागि रामकृष्ण श्रेष्ठको नियुक्ति भइसकेको मन्त्री महतले बताए।