काठमाडौँ । सूर्योदय मिल्क एण्ड वेभरेज उद्योग विराटनगरले परम ब्रण्डको घ्यु दोस्रो पटक जापान पठाएको छ । पुनः १५ सय किलो घ्यु,४ हजार किलो चिउरा, १८ सय किलो चियापत्ती र १२ सय किलो मह जापान पठाएको उद्योगका सञ्चालक एवं नेपाल डेरी एसोसिएसनका केन्द्रिय सदस्य मनोज यादवले बताए ।
उद्योगले गत जेठ १३ गते पहिलो पटक १२ सय किलो घ्यु, ३ हजार किलो चिउरा, १२ सय किलो चियापत्ती र १२ सय किलो मह जापान पठाएको थियो । यादवका अनुसार जापान पठाएको सामान एक हप्तामै खपत भएको र पुनः डिमाण्ड आएपछि दोस्रो पटक पठाइएको हो ।
अघिल्लो पटकभन्दा यसपटक चिउरा र चियापत्तीको परिमाण बढाएको उद्योगले जनाएको छ । जापानबाट प्रतिमहिना ५ हजार किलो घ्युको माग आएकाले यो मागलाई निरन्तर पूरा गर्ने यादवले जनाएका छन् ।
सूर्योदय मिल्क एण्ड बेभरेज उद्योगसँग जापानमा रहेको पद्मा कर्पोरेसन लिमिटेडले नेपालको घ्यू वार्षिक ५० मेट्रिक टन लिने सम्झौता गरेको छ । उक्त कम्पनीले जापानसहित ६–७ वटा देशमा सामान निर्यात गर्ने जनाएको छ । उद्योगले हाल गुणस्तरीय स्तरको दूध, चिया दुध, दूध पाउडर, घ्यु, पनिर, दही, बटर लगायतका प्रोडक्टहरु उत्पादन गर्दै आएको छ ।
गत वर्ष कोशीमा दूधको अत्याधिक उत्पादन हुँदा उद्योगमा पनि धूलो दूध अत्यधिक उत्पादन भएको थियो । उद्योगमा अहिले पनि करोडौं मूल्यको दूधजन्य वस्तु स्टकमा छ । उद्योग सञ्चालक यादवका अनुसार आन्तरिक डिमाण्ड बढेको खण्डमा पनि निर्यातले निरन्तरता पाउनेछ ।
विगतमा डिडिसीले जापानमा घ्यु पठाउने गरेकोमा माग अनुसार पठाउन नसक्दा सम्झौता रद्द भएको थियो । कोशी प्रदेश सरकारले निर्याततर्फ घ्युमा प्रतिकिलो १२०, नौनीमा ९० रुपैयाँ, होलमिल्क पाउडरमा ८० रुपैयाँ र स्किम मिल्क पाउडरको लागि ७० रुपैयाँ अनुदान दिँदै आएको छ ।
प्रदेश सरकारले अन्य अनुदानका कार्यक्रम कटौती गरेको भएपनि निर्यातमा दिने अनुदानलाई भने निरन्तरता दिएको कुरा नेपाल डेरी एसोसिएसनका अध्यक्ष प्रल्हाद दाहालले जानकारी दिए ।
