काठमाडौँ। नेकपा एमालेका महासचिव शंकर पोखरेलले ‘पपुलिस्ट’ कुरा गर्ने र भिड जम्मा गरि छोएर रोग निको पार्ने दाबी गर्ने सिमान्त गुरू एकै भएको टिप्पणी गरेका छन्। सोमबार सामाजिक संजालमा एक पोस्ट गर्दै महासचिव पोखरेलले सो कुरा बताएका हुन्।
संसदमा छलफल भइरहेको नयाँ आर्थिक वर्षको नीति तथा कार्यक्रमलाई गतिविहीन दस्तावेज बताउँदै आएको एमालेले खारेज गर्न वा पुनःलेखन गर्न माग गरेको छ। यसमा राष्ट्रिय स्वतन्त्र पार्टीको समर्थन छैन। त्यसैप्रति इंगित गर्दै नेता पोखरेलले सो पोस्ट गरेका हुन्।
पुरानो होइन नयाँ भनेर नीतिविहीन, उद्देश्यविहीन पपुलिस्ट राजनीति गर्नेहरूले ठीक र बेठीक छुट्टयाउने द्वन्द्वात्मक चेतनावाट समाजलाई विमुख बनाएको उनको आरोप छ।
उनले लेखेका छन्, ‘कहाँ चुकेको छ सरकार? नीति तथा कार्यक्रमले के कुरालाई सम्बोधन गर्नु पर्थ्यो भन्ने कुरामा विपक्षी दलका नेताले तथ्यगत रूपमा आफूलाई प्रस्तुत गर्दा पनि गफ ठान्ने जमातले नबोलिकन राष्ट्रलाई डुवाउने देउवा र खुलेआम लुट मच्चाएर शान्ति प्रक्रियाको दुहाइ दिने प्रचण्डको पैरवी गर्नु कुनै अनौठो कुरा होइन।’
