घोराही सिमेन्टको आईपीओ रोक्का गर्न निर्देशन

काठमाडौँ। नेपाल धितोपत्र बोर्डले घोराही सिमेन्टको प्रिमियम मूल्यमा निष्काशन गरेको शेयर (आइपिओ) रोक्का गर्न निर्देशन दिएको छ।

एक करोडभन्दा बढी कित्ता आईपीओ रद्द भएपछि बोर्डले रोक्का गर्न निर्देशन दिएको हो। सीसीएस एण्ड क्लियरिङ लिमिटेड स्रोतका अनुसार अझै बढी कित्ता आईपीओ रद्द बढ्न सक्ने बताएको छ। आवेदकहरूले बैंकमा भएको रकमभन्दा बढीको आवेदन दिएको पाइएपछि बोर्डले तत्काललाई आईपीओ निष्कासन रोक्का गर्न निर्देशन दिएको हो।

सोमबार नै सीडीएससीले सूचना जारी गरेर बैंक खातामा भएको रकमभन्दा बढीको आईपीओ भर्नेलाई कारबाही गरिने बताएको छ। संगठित संस्थाले जारी गरेको सार्वजनिक निष्कासनमा बैंक खातामा मौज्दात नराखी बढी रकमको आवेदन दिई संस्थाले जारी गरेको धितोपत्रको निष्कासन प्राप्त आवेदनको संख्या वा परिणामलाई प्रभावित पार्न खोजेमा कारबाही हुने जनाएको छ।