काठमाडौँ। आगामी वर्षका लागि सरकारले ल्याएको नीति तथा कार्यक्रम राष्ट्रियसभाबाट बहुमतले पारित भएको छ। सरकारले संघीय संसद्को संयुक्त बैठकमा प्रस्तुत गरेको आर्थिक वर्ष २०८०/८१ को नीति तथा कार्यक्रममाथि मंगलबार राष्ट्रियसभामा सांसदहरुले उठाएका प्रश्नहरुको प्रधानमन्त्री पुष्पकमल दाहालले जवाफ दिएका छन्।
आइतबारदेखि सुरु भएको छलफलमा मंगलबार सांसदहरूले नीति तथा कार्यक्रममाथि आफ्ना धारणा राखेका थिए। जेठ ५ गते राष्ट्रपति रामचन्द्र पौडेलले संसद्को दुवै सदनको संयुक्त बैठकमा प्रस्तुत गरेको नीति तथा कार्यक्रम राष्ट्रियसभाबाट बहुमतले पारित भएको हो।
‘सम्माननीय राष्ट्रपतिबाट २०८० जेठ ५ गते शुक्रबारका दिन संघीय संसद्को दुवै सदनको संयुक्त बैठकमा गर्नुभएको सम्बोधनमा उल्लिखित आर्थिक वर्ष २०८०/८१ का लागि नेपाल सरकारको नीति तथा कार्यक्रमलाई निर्णयार्थ प्रस्तुत गर्दछु,’ राष्ट्रियसभा अध्यक्ष तिमिल्सिनाले संसद्मा भने, ‘यो प्रस्तावको पक्षमा हुने सदस्यहरुले हुन्छ भन्नुहोला, विपक्षमा रहेका सदस्यहरुले हुन्न भन्नुहोला।’ यसरी राष्ट्रियसभामा अध्यक्ष तिमिल्सिनाले राष्ट्रियसभामा सरकारको नीति तथा कार्यक्रमलाई निर्णयार्थ प्रस्तुत गरेका थिए।
‘हुन्छ भन्ने माननीय सदस्यहरुको बहुमत भएकाले आगामी आर्थिक वर्ष २०८०/८१ का लागि नेपाल सरकारको नीति तथा कार्यक्रम बहुमतले पारित भएको घोषणा गर्दछु।’
