एजेन्सी । बलिउड अभिनेता नवाजुद्दीन सिद्दीकी आजकल आफ्नो अभिनय भन्दा पनि आफ्नो व्यक्तिगत जीवनका कारण चर्चामा छन् ।
कलाकारहरु आज ठूला स्टार बनेका छन् तर कुनै समय थियो जब उनीहरु साना भूमिकामा देखिन्थे ।
सुरुका दिनमा निकै संघर्ष गर्नुपरेको उनी बताउँछन् ।
उनले बलिउडमा भेदभावको सामना गर्नु परेको बताए । यसबारे अभिनेता स्वयमले खुलासा गरेका हुन् ।
एउटा घटनालाई उद्धृत गर्दै नवाजुद्दीन सिद्दिकीले आफूले एकपटक भेदभावको सामना गर्नुपर्ने बताए ।
उनी मुख्य अभिनेतासँग खाना खान गएका थिए तर उनलाई कलरमा तानेर हटाइयो ।
नवाजुद्दीनले एक अन्तर्वार्तामा खुलासा गरे, ‘मैले स्पट ब्वाइसँग पानी मागेको थिएँ र उसले मलाई पूर्ण रूपमा बेवास्ता गर्यो । त्यसपछि म आफैं पानी लिन जान्थें । बलिउडमा धेरै प्रोडक्सन हाउसहरू छन् जसले फिल्मको कलाकार र टोलीलाई फरक तरिकाले अप्रोच गर्छन्। धेरै ठाउँमा सबैले सँगै खान्छन् तर धेरै ठाउँमा खाना खाँदा छुट्टाछुट्टै बस्छन् । जुनियर कलाकारहरु छुट्टै खान्छन् । सहायक कलाकारलाई छुट्टै खाना र मुख्य कलाकारले छुट्टै खाना खान्छन् ।’
अर्को घटना सुनाउँदै नवाजले आफूले वरिष्ठ अभिनेतासँग ५० रुपैयाँ ऋण मागेको बताए । उनले ती वरिष्ठ कलाकारको अवस्था पनि राम्रो नभएको बताए ।
वरिष्ठ अभिनेतासँग जम्मा १०० रुपैयाँ थियो, जसमध्ये उनले नवाजलाई ५० रुपैयाँ दिए । एक अर्काको अवस्था देखेर दुवैलाई दया लागेको र दुवै रोएको अभिनेताले बताए ।
