शाहबाज सरकार कानुन बदलेरै भएपनि इमरान खानलाई सजाय दिने तयारीमा !

एजेन्सी । पाकिस्तानका पूर्वप्रधानमन्त्री इमरान खानको समस्या अझै सकिएको छैन । चुनावी सम्भावनाको बीचमा उनीमाथि अयोग्य ठहराउने प्रयासहरु भइराखेको मिडिया रिपोर्टमा उल्लेख छ । सेहबाज सरिफ सरकारले इमरानलाई कारवाही गर्न अर्को षड्यन्त्र सुरु गरेको मिडिया रिपोर्टमा उल्लेख छ । पाकिस्तानी संसदको माथिल्लो सदनले बिहीबार सेना ऐन १९५२ मा संशोधन गर्ने निर्णय गरेको छ ।

यो संशोधन अन्तर्गत पाकिस्तानको सुरक्षा र सेनासँग सम्बन्धित अनाधिकृत जानकारी खुलासा गर्ने व्यक्तिलाई पाँच वर्षको कारावास र संलग्न व्यक्तिको राजनीतिक गतिविधिमा दुई वर्षसम्म प्रतिबन्ध लगाउन सकिनेछ।

आर्मी एक्टमा यो संशोधन यस्तो समयमा गरिएको हो, जब पाकिस्तानका पूर्व प्रधानमन्त्री इमरान खान सिफर प्रकरणमा फसेका छन् । पाकिस्तानको संघीय अनुसन्धान एजेन्सी (एफआईए) ले इमरानको राष्ट्रिय सुरक्षालाई खतरामा पार्ने आधिकारिक गुप्तचर खुलासा गरेको विषयमा अनुसन्धान गरिरहेको छ। यो मुद्दालाई पाकिस्तानको करिडोरमा सामान्यतया ‘साइफर केस’ भनेर चिनिन्छ।